شہباز شریف کا میانمار کے ہم منصب سے رابطہ، تباہ کن زلزلے پر اظہار تعزیت 

اسلام آباد:وزیراعظم شہبازشریف نے میانمار میں تباہ کن زلزلے پر ہم منصب وزیراعظم سے ٹیلیفونک رابطہ کیا ہے جس میں انھوں نے میانمار کے وزیراعظم سے اظہارِ تعزیت کیا۔
وزیراعظم محمد شہبازشریف نے سینئر جنرل من آنگ ہلینگ، چیئرمین سٹیٹ ایڈمنسٹریشن کونسل و وزیراعظم میانمار سے ٹیلیفونک گفتگو کی، تباہ کن زلزلے کے نتیجے میں قیمتی جانوں اور املاک کے نقصان پر پاکستانی عوام اور حکومت کی جانب سے گہرے دکھ اور افسوس کا اظہار کیا۔
 ٹیلیفونک گفتگو میں وزیراعظم شہباز شریف نے وزیراعظم میانمار کو امداد کی یقین دہانی کرتے ہوئے کہا ہے کہ این ڈی اے ایم 70 ٹن امدادی سامان فراہم کریگا، 2 کھیپ میں اگلے 48 گھنٹے میں متاثرین کو پہنچائی جائے گی۔
وزیراعظم شہبازشریف نے میانماری عوام کی بہادری پراعتماد کا اظہار کرتے ہوئے کہا کہ امید کرتے ہیں قدرتی آفت پر جلد قابو پالیں گے۔
 میانمار کے وزیر اعظم نے وزیراعظم شہباز شریف اور پاکستانی عوام کے حسن سلوک کو سراہا، میانمار کے وزیراعظم نے مشکل کی اس گھڑی میں میانمار کے عوام کے ساتھ کھڑے ہونے پر ان کا شکریہ ادا کیا۔