یہ کیسا اسلامی ملک ہےجہاں بانی پی ٹی آئی کو عید کی نماز نہیں پڑھنے دی گئی، عمر ایوب

اسلام آباد:قومی اسمبلی میں اپوزیشن لیڈر عمر ایوب نے حکومت پر سخت الفاظ میں تنقید کرتے ہوئے کہا ہے کہ ہم ایسے اسلامی ملک میں رہ رہے ہیں  جہاں بانی بانی پی ٹی آئی کو عید کی نماز نہیں پڑھنے دی گئی۔
بانی پی ٹی آئی سے آج دوستوں کی ملاقات کا دن تھا،اس حوالے سے پی ٹی آئی رہنما عمر ایوب، شبلی فراز ترجمان بانی پی ٹی آئی نیاز اللہ نیازی، عالیہ حمزہ اور دیگر ملاقات کے لیے پہنچے۔
اڈیالہ جیل کے باہر میڈیا سے گفتگو کرتے ہوئے انہوں نے کہا کہ ہمیں عدالتی حکم کے باوجود بانی سے ملاقات نہیں کرنے دی گئی، جمعرات کی ملاقات کی لسٹ بانی خود فائنل کرکے وکلاء کے حوالے کرتے ہیں۔
عمر ایوب نے کہا کہ پتا نہیں کس کے کہنے پر ملاقات کی اجازت نہیں دی جا رہی، بانی کی اڑھائی ماہ سے بچوں سے بات نہیں ہونے دی گئی، بہنوں سے ملاقات نہیں کرنے دی گئی۔
انہوں نے کہا کہ عید کےبعد آج اپنے لیڈر سے ملاقات کیلئے آئے تھے، ایک بار پھر ہمیں ملاقات کی اجازت نہیں دی گئی، ڈھائی ماہ سےہم متواترآرہے ہیں ملاقات نہیں دی جارہی ہے۔
اپوزیشن لیڈر عمر ایوب نے الزام لگایا کہ بانی پی ٹی آئی کو عید کی نماز نہیں پڑھنے دی گئی یہ کیسا اسلامی ملک ہے؟
انہوں نے مزید کہا کہ آج شبلی فرازنےتوہین عدالت کی درخواست دائر کی ہے، امید ہے جج صاحبان اپنے احکامات کی کچھ پاسداری کرائیں گے۔
اڈیالہ جیل کے باہر سینیٹ میں اپوزیشن لیڈر شبلی فراز نےمیڈیا سے گفتگو میں کہا کہ ہم عدالت کے حکم پر بانی پی ٹی آئی سے ملاقات کیلئے یہاں آئے ہیں مگر یہاں عدالتی حکم کا کوئی مان ہی نہیں رہا، عدالتی فیصلوں کو جوتے کی نوک پر رکھا جارہا ہے،ان کا کہناتھا کہ ایسی مثالیں قائم کی جارہی ہیں جن کی کوئی نظیر نہیں۔
میڈیا سےبات کرتے ہوئے شبلی فراز نے مزید کہا کہ عدالتیں اپنا وقار اور رٹ ختم کرچکی ہیں، عدالتیں اپنے احکامات کی توہین پر کارروائی کریں، ہماری ملاقات نہ کروانا عدالت کے فیصلے کی کھلم کھلا توہین ہے۔ عدالتوں اورججز کی کوئی حیثیت ہی نہیں رہی ہے۔
ان کا کہنا تھا کہ عدالتوں نے ہی بانی اور بشری بی بی کو سزا دی ہے،انہی عدالتوں کے احکامات پرعمل در آمد نہیں ہورہا ہے،انہوں نے کہا کہ ہماری ملاقات نہ کروانا عدالت کے فیصلے کی کھلم کھلا توہین ہے۔