بجلی سستی کروانے میں ایم کیو ایم نے نہایت اہم کردار ادا کیا : ڈاکٹر فاروق ستار

ایم کیو ایم پاکستان کے رہنما فاروق ستار کا کہنا ہے بجلی سستی کروانے میں ان کی جماعت کا نمایان کردار ہے۔بجلی کی قیمت میں مزید 6 روپے کمی کی گنجائش ہے اور امید ہے کہ وزیر اعظم سے مزید کمی کا اعلان کرانے میں کامیاب ہوجائیں گے۔
کراچی میں میڈیا سے گفتگو کرتے ہوئے متحدہ قومی موومنٹ پاکستان (ایم کیو ایم پ) کے رہنما ڈاکٹر فاروق ستار کا کہنا تھا کہ گزشتہ روز وزیر اعظم نے بجلی کی قیمتوں میں مناسب کمی کا اعلان کیا،یہ کمی مختلف قسم کے صارفین کےلیے 12 سے 17 فیصد کی کمی ہے،یہ ایک بڑی سہولت ہے جو موجودہ حکومت نے دی ہے۔

فاروق ستار نے کہاکہ بجلی کی قیمت میں مزید 6 روپے کمی کی گنجائش ہے، وزیر اعظم نے عید کےبعد کراچی آنے اور ایم کیو ایم کے جلسے سے خطاب کرنےکی حامی بھری ہے،امید ہےکہ وزیر اعظم سے کراچی جلسے میں بجلی کی قیمت مزید 6 روپے کم کرانے میں کامیاب ہوجائیں گے۔

ان کا کہنا تھا امید ہے اگلے بجٹ میں شرح سود 12 سے کم ہو کر 9 فیصد تک آئے گی،لوگوں کو آسان قرضے مل سکیں گے، یہ ایک سال کے عرصے میں ایک نمایاں پیش رفت ہوئی ہے،اس کا اثر نچلی سطح فوری طور پر نہیں آئے گا۔

سینئر رہنما ایم کیو ایم فاروق ستار کا کہنا تھاکہ ایم کیو ایم نے اس مخلوط حکومت میں شامل ہوکر دو باتوں پر فوکس کیا کہ کس طرح ہم عوام کےلیے بجلی کے بلوں کو کم اور پانی کے مسائل کو حل کریں، ان دونوں معاملات میں ایم کیو ایم کا بڑا کردار ہے۔
ڈاکٹر فاروق ستار نے کہا کہ ہم نے یہ وعدہ کیا تھاکہ عید کے بعد بجلی کی قیمتوں میں 5 سے 10 روپے کمی آئے گی،کل تاجر اور صنعتکاروں کی جانب سے شکریہ کے فون آئے، کسی کا بل 10 ہزار آ رہا ہے تو اب 8500  آئے گا۔

فاروق ستار کا کہنا تھا بجلی سستی ہونے سے صنعت ترقی کرےگی عام تجارت اور کاروبار کو فائدہ ہو گا، اس کمی میں ایم کیو ایم کا نمایاں کردار ہے۔