لاہور: بارات والے دن لڑکی کو قتل کرنے والا ملزم گرفتار

لاہور: پولیس نے کارروائی کرتے ہوئے صوبائی داراحکومت لاہور کے علاقے سندر میں گذشتہ روز بارات کے دوران لڑکی عائشہ کو قتل کرنے والے ملزم کو گرفتار کر لیا گیا۔
پولیس حکام کے مطابق ملزم اکرام مقتولہ عائشہ کا بہنوئی ہے،جس نے مقتولہ عائشہ کو رشتہ کے تنازع پر قتل کیا، ملزم واردات کے بعد فرار ہو گیا تھا، ملزم کو جدید ٹیکنالوجی، ہیومن انٹیلیجنس کی مدد سے گرفتار کیا گیا۔
خیال رہے کہ گزشتہ روز سندر کے علاقے عزیز کالونی میںقتل کی افسوسناک واردات ہوئی جہاں پر 23 سالہ عائشہ کی بھائی پھیرو کے رہائشی نوجوان فلک شیر سے شادی تھی اور اس کی بارات دوپہر گذشتہ روز ایک بجے آنی تھی۔
گذشتہ رات مہندی کی تقریب کے بعد عائشہ کمرے میں سو گئی اس دوران علی الصبح اسے فائرنگ کرکے قتل کر دیا اورملزم پستول کو گھر کے ساتھ ہی خالی پلاٹ میں پھینک کر فرار ہو گیا۔. لواحقین نے مقتولہ کے بہنوئی پر شبہ کا اظہار کیا تھا۔
عزیز واقارب کا کہنا تھا کہ مقتولہ کا بہنوئی اکرام کے حالات مشکوک تھے، قتل کے بعد طبعیت خراب کا بہانہ بنا کر غائب ہو گیا۔ عزیز اقارب نے ملزم کو جلد گرفتار کرکے قرار واقعی سزا دینے کا مطالبہ کیا۔