9مئی مقدمات:بانی پی ٹی آئی کی ضمانت کی درخواستیں سماعت کیلئے مقرر

لاہور:9 مئی 2023 کے جلاؤ گھیراؤ کے مقدمات میں بانی چئیرمین پاکستان تحریک انصاف (پی ٹی آئی) کی ضمانت کی درخواستیں سماعت کے لیے مقرر ہو گئیں ہیں۔
تفصیلات کے مطابق لاہور ہائیکورٹ نے بانی پی ٹی آئی کی 9 مئی جلاؤ گھیراؤ کے مقدمات میں ضمانت کی درخواستیں سماعت کیلئے مقرر کر دیں۔
بانی پی ٹی آئی کی درخواستوں پر لاہور ہائیکورٹ کا 2 رکنی بنچ 10 اپریل کو سماعت کرے گا، بنچ میں جسٹس سید شہباز رضوی اور جسٹس طارق سلیم شیخ شامل ہیں۔
بانی پی ٹی آئی نے نو مئی کے 8 مقدمات میں ضمانت کی درخواستیں دائر کر رکھی ہیں، بانی نےاپنے وکیل بیرسٹر سلمان صفدر کی وساطت سے ضمانتیں دائر کیں،  جن میں جناح ہاؤس، عسکری ٹاور، تھانہ شادمان جلاؤ گھیراؤ سمیت آٹھ مقدمات میں ضمانت کی درخواستیںشامل ہیں۔
عدالت نے سپیشل پراسیکیوٹرز کو دلائل دینے کیلئے طلب کررکھا ہے۔
 علاوہ ازاں لاہور ہائیکورٹ نے ’ایکس‘ کی بندش کے خلاف دائر درخواستیں بھی سماعت کیلئے مقرر کر دیں۔
چیف جسٹس لاہورہائیکورٹ عالیہ نیلم کی سربراہی میں تین رکنی بنچ 8 اپریل کو سماعت کرے گا، بنچ کے دیگر ارکان میں جسٹس فاروق حیدر اور جسٹس علی ضیاء باجوہ شامل ہیں، عدالت نے چیئرمین پی ٹی اے سے تفصیلی جواب طلب کر رکھا ہے۔