صدر مملکت کی طبیعت کے حوالے سے ڈاکٹر عاصم کا ردعمل آگیا

کراچی: صدر مملکت آصف علی زرداری کی صحت کے حوالے سے ان کے ذاتی معالج ڈاکٹر عاصم کا ردعمل آگیا۔
میڈیا سےگفتگو کرتے ہوئے ڈاکٹر عاصم نے کہا کہ صدرِ مملکت آصف علی زرداری کی بیماری کے حوالے سے بھارتی چینلز اور سوشل میڈیا پر چلنے والی تصاویر جعلی اور خبریں و اطلاعات غلط ہیں۔
انہوںنے کہا کہ صدرِ مملکت آصف علی زرداری کی طبیعت کافی بہتر ہوگئی ہے۔ وہ کل یا پرسوں اسپتال سے ڈسچارج ہوجائیں گے۔
انہوں نے مزید کہا کہ کورونا وائرس اب بھی پاکستان میں موجود ہے تاہم اینٹی وائرس ادویات آ چکی ہیں اور صورتِ حال قابو میں ہے،ان کا کہنا تھا کہ سوشل میڈیا پر جو خبریں اور فوٹیجز گردش کر رہی ہیں وہ غیر مناسب اور جعلی ہیں۔
انہوں نے کہا کہ صدر مملکت کا عید کے دن شام کو پھر فون آیا اور کہا کہ سردی لگ رہی ہے، مجھے بخار ہو گیا ہے۔  میں رات کو نوابشاہ پہنچا۔ وہاں اتنی سہولیات نہیں ہیں۔ گزشتہ پیر کو ہم صدرِ مملکت کو کراچی لائے، اسپتال میں داخل کیا اور ان کے ٹیسٹ شروع کیے۔ ٹیسٹ سے یہ ثابت ہوا کہ صدرِ مملکت کو کورونا ہوا ہے۔  
ڈاکٹر عاصم کا کہنا تھا کہ سیاسی مخالفین جو مرضی کہتے رہیں، حقیقت کو جھٹلایا نہیں جا سکتا، بھارت تو ویسے ہی ہمارا دشمن ہے، وہاں سے ہمارے خلاف پروپیگنڈا کیا جا رہا ہے۔
میڈیا سے گفتگو کرتے ہوئےانہوں نےمزید بتایا کہ صدر مملکت کو بلڈ پریشر اور شوگر کا عارضہ ضرور ہے لیکن ان کی طبیعت اب بہتر ہے اور وہ زیر علاج ہیں۔
 ڈاکٹرعاصم نے کہا کہ اسپتال سے صدر کی فوٹیج جاری کرنا یا نہ کرنا ایک سیاسی فیصلہ ہے، جس پر حکومت یا ایوانِ صدر کو غور کرنا ہے۔
انہوں  نے عوام سے اپیل کی ہے کہ سوشل میڈیا پر پھیلائی جانے والی جعلی معلومات پر توجہ نہ دی جائے اور صرف مستند ذرائع سے حاصل شدہ اطلاعات پر یقین کیا جائے۔