شادی شدہ بیٹی کو متوفی والد کے سرکاری کوٹے پر نوکری سے محروم کرنا غیر قانونی اور امتیازی قرار
شادی کے بعد عورت کی شناخت، قانونی حقوق اور خودمختاری ختم نہیں ہوتی،سپریم کورٹ


سپریم کورٹ نے شادی شدہ بیٹی کو متوفی والد کے سرکاری کوٹے پر نوکری سے محروم کرنے کو غیر قانونی اور امتیازی قرار دے دیا۔ عدالت نے قرار دیا کہ شادی کے بعد عورت کی شناخت، قانونی حقوق اور خودمختاری ختم نہیں ہوتی، اور اسے ملازمت سے محروم کرنا آئین اور قانون دونوں کی صریح خلاف ورزی ہے۔
یہ اہم فیصلہ جسٹس منصور علی شاہ نے تحریر کیا، جو نو صفحات پر مشتمل ہے۔ عدالت نے کیس کا تفصیلی فیصلہ جاری کرتے ہوئے درخواست گزار زاہدہ پروین کی برطرفی کو کالعدم قرار دیتے ہوئے ان کی ملازمت کو تمام سابقہ مراعات کے ساتھ بحال کرنے کا حکم دیا۔
سپریم کورٹ نے واضح کیا کہ خیبرپختونخوا سول سرونٹس رولز 1989 کے تحت متوفی سرکاری ملازمین کے تمام بچے، بشمول شادی شدہ بیٹیاں، سرکاری نوکری کے اہل ہیں۔ عدالت نے کہا کہ سیکشن آفیسر کی طرف سے ایک وضاحتی مراسلے کے ذریعے رولز میں ترمیم کرنا نہ صرف غیر قانونی بلکہ آئینی اقدار کے بھی منافی ہے۔
فیصلے میں کہا گیا کہ شادی شدہ بیٹیوں کو والد کے کوٹے پر نوکری سے محروم کرنا امتیازی سلوک ہے، جو آئین کے آرٹیکل 14 (انسانی وقار)، 25 (برابری کا حق) اور 27 (ملازمتوں میں امتیاز سے تحفظ) کی کھلی خلاف ورزی ہے۔
عدالت نے زور دیا کہ عورت کی قانونی اور مالی خودمختاری بنیادی حق ہے، جو شادی پر منحصر نہیں ہو سکتی۔ اسلام میں بھی عورت کو اپنی آمدنی، جائیداد اور مالی معاملات پر مکمل اختیار حاصل ہے، اور پاکستان نے خواتین کے خلاف امتیازی سلوک کے خاتمے کے عالمی کنونشن (CEDAW) کی توثیق کر رکھی ہے، جو شادی کی بنیاد پر ملازمت کے حق سے محرومی کو ممنوع قرار دیتا ہے۔
عدالت نے مزید کہا کہ ایسی روایات اور انتظامی اقدامات کو ختم کیا جانا چاہیے جو شادی کی بنیاد پر عورتوں کو عوامی اور قانونی حقوق سے محروم کرتے ہیں۔ عدالتوں اور انتظامی اداروں کو چاہیے کہ وہ اپنے فیصلوں میں صنفی حساس اور غیرجانبدار زبان استعمال کریں۔ ”شادی شدہ بیٹی شوہر پر بوجھ بن جاتی ہے“ جیسے الفاظ پدرشاہی سوچ کی عکاسی کرتے ہیں اور آئینی اقدار کے منافی ہیں۔
فیصلے کے مطابق، درخواست گزار زاہدہ پروین کو 17 مارچ 2023 کو اپنے مرحوم والد کے کوٹے پر خیبرپختونخوا کے ضلع کرک میں گورنمنٹ گرلز پرائمری سکول میں بطور پرائمری ٹیچر تقرری دی گئی تھی۔ یہ تقرری قاعدہ 10(4) کے تحت عمل میں آئی تھی، لیکن محض دو ماہ بعد، 15 مئی 2023 کو ضلعی تعلیمی افسر نے بغیر کسی شوکاز نوٹس کے تقرری منسوخ کر دی۔
یہ فیصلہ 21 فروری 2020 کے ایک مراسلے کی بنیاد پر کیا گیا، جس میں کہا گیا تھا کہ شادی شدہ بیٹی کو والد کے کوٹے پر نوکری کا حق حاصل نہیں۔ بعدازاں 28 اپریل 2023 کو مزید وضاحت کی گئی کہ شادی شدہ بیٹی صرف اسی صورت میں اہل ہو سکتی ہے جب وہ شوہر سے علیحدہ ہو اور والدین پر انحصار کرتی ہو۔
درخواست گزار نے اس فیصلے کے خلاف محکمانہ اپیل دائر کی، اور جواب نہ ملنے پر خیبرپختونخوا سروس ٹریبونل پشاور سے رجوع کیا، جہاں 3 جون 2024 کو ان کی اپیل خارج کر دی گئی۔ بعد ازاں انہوں نے سپریم کورٹ سے رجوع کیا، جہاں انہیں انصاف ملا۔
سپریم کورٹ کے اس فیصلے کو خواتین کے حقوق کے تحفظ اور صنفی مساوات کے لیے ایک اہم سنگ میل قرار دیا جا رہا ہے۔ عدالت نے اپنے فیصلے میں کہا کہ عورتوں کے خلاف امتیازی رویوں کا خاتمہ آئینی ذمہ داری ہے، اور ریاست کو چاہیے کہ وہ ہر شہری کو مساوی مواقع فراہم کرے، خواہ وہ مرد ہو یا عورت۔

نئی لالی وڈ فلم ’عاشق رنگ رنگیلے‘ سینما گھروں کی زینت بن گئی
- 9 دن قبل

پی پی 203 چیچہ وطنی کے ضمنی انتخاب میں مسلم لیگ (ن) کا امیدوار بازی لے گیا
- 8 دن قبل

ڈی جی آئی ایس پی آر کی لاہور کی جامعات آمد، طلبہ سے خصوصی نشستیں
- 9 دن قبل

راولپنڈی: گھر سے خاتون اینکر ربیعہ احسن کی گولی لگی لاش برآمد
- 8 دن قبل

پولیس افسران کی ترقیوں کے خلاف پنجاب حکومت کی اپیلیں خارج
- 9 دن قبل

پاکستان اور تاجکستان کی مشترکہ فوجی مشق دوستی تھری چراٹ میں اختتام پذیر
- 10 دن قبل

پشاور میں نادرا کا اسسٹنٹ ڈائریکٹر فائرنگ سے جاں بحق
- 10 دن قبل

وی آئی پی وزٹ کی وجہ سے امتحانات ملتوی کرنے پر ڈی سی جہلم عہدے سے فارغ
- 8 دن قبل
پہلے ایل پی جی اوراب بجلی بم گرا دیا گیا
- 9 دن قبل

پاکستانی فلم ’میرا لیاری‘ نے بیلاروس کے معروف لسٹاپڈ فلم فیسٹیول میں اسپیشل جیوری ایوارڈ جیت لیا
- 9 دن قبل

پیٹرول اور ڈیزل کی قیمتوں میں کمی کا اعلان
- 11 دن قبل

انڈر 19 ایشیا کپ: پاکستان نے بھارت کو 3 وکٹ سے شکست دے دی
- 8 دن قبل



