ملک کو تقسیم کرنے والی جماعت آج خود ٹکڑے ٹکڑے ہوگئی  مریم اورنگزیب

لاہور:سینئر وزیر پنجاب مریم اورنگزیب نے کہا ہے کہ ملک کو تقسیم کرنے والی جماعت آج خود ٹکڑے ٹکڑے ہوگئی، دوسروں کو جیلوں میں ڈال کر احتساب کرنے کا تماشا پوری قوم نے دیکھ لیا۔
لاہور میں پریس کانفرنس کرتے ہوئے صوبائی وزیر مریم انورنگزیب کا کہنا تھا کہ ملک پر 4 سال نالائق اور نا اہل حکمران رہے، ان کے دور میں مہنگائی 60 فیصد تھی، اس وقت ملکی تاریخ کی کم ترین سطح 0.7 فیصد پر ہے۔
ان کا کہنا تھا کہ صنعتی حلقوں سمیت تمام شعبوں کی طرف سے مبارکباد دی جارہی ہے، الیکشن مہم کے دوران نوازشریف نے قوم سے عوام کو ریلیف دینے کے وعدے کیے تھے، ملک کو 3 ٹکڑنے کا خواب دیکھنے والی جماعت آج خود ٹکڑے ٹکڑے ہوگئی ہے۔
سینئر وزیر نے کہا کہ ایک سال میں مہنگائی کی شرح میں ریکارڈ کمی آئی ہے، جو انتشار کی پیداوار ہیں، وہ عوام کو ریلیف نہیں دے سکتے، عمران خان نے ملک کو ڈیفالٹ کے دہانے پر پہنچایا۔
انہوں نے کہا کہ پی ٹی آئی کے دور میں سی پیک ختم ہوا، ایک کروڑ لوگ بیروزگار ہوئے، آج ان کی جماعت میں لوگ ایک دوسرے کو گالیاں دے رہے ہیں،ان کا مزید کہنا تھا کہ ایک دوسرے کو چورچور کہا جا رہا ہے، جو انتشار کی پیداوار ہیں وہ انتشار ہی کر سکتے ہیں، دوسروں کو جیلوں میں ڈال کر احتساب کرنے کا تماشا پوری قوم نے دیکھ لیا۔
ان کا کہنا تھا کہ بجلی کی قیمت میں کمی کسی معجزے سے کم نہیں، آئی ایم ایف کے پروگرام میں رہتے ہوئے عوام کو ریلیف دینا بڑا کام ہے، تاریخ کا سب سے بڑا کسان ریلیف پیکیج دیا گیا۔
مریم اورنگزیب نے کہا کہ جون تک پورے پنجاب میں 700 سڑکیں مکمل ہو جائیں گی، گندم کے معاملے پر وزیراعلیٰ پنجاب کی زیرصدارت اجلاس اگلے ہفتے ہوگا،،ان کا کہنا تھاکہ پنجاب میں مفت ادویاب کی فراہمی دوبارہ شروع ہوگئی ہے، تقریباً 7لاکھ مریضوں کو اب تک مفت ادویات دی جاچکی ہیں۔
ان کا کہنا تھا کہ کینالز والے معاملے پر وزیراعظم نے واضح بیانات دیئے ہیں، اس پرکوئی سیاست نہیں ہونی چاہیے، کینالز منصوبے پر بات کیلئے مشترکہ مفادات کونسل (سی سی آئی) کا فورم موجود ہے، کسی کا پانی چوری نہیں ہو رہا، آئین میں درج ہے کہ پنجاب اور سندھ کا اپنا اپنا حصہ ہے۔