وزیراعظم نے مشکل وقت میں درست فیصلے کر کے ریاست کو بچایا، عطاء اللہ تارڑ

لاہور:وفاقی وزیر اطلاعات عطاء تارڑ نے کہا ہے کہ عوامی حمایت سے مشکل وقت میں درست فیصلے کئے، وزیر اعظم نے سیاست نہیں ریاست کو بچایا، آنیوالے دنوں میں مزید خوشخبریاں آئیں گی۔
اپنے حلقہ این اے127 میں عوامی اجتماع سے خطاب کرتے ہوئے وفاقی وزیرعطا تارڑ کا کہنا تھا کہ وزیراعظم ایک ایک دن کو عوام کی امانت سمجھ کر گزارتے ہیں، وزیراعظم نے وعدہ کیا تھا کہ بجلی بلوں میں ریلیف دیں گے، آج وہ وعدہ پورا ہو چکا ہے۔
اجتماع سے خطاب میں انہوں نے کہا کہ مہنگائی ایک سال میں سنگل ڈیجٹ پر آگئی، یہ سب ٹیم ورک کا نتیجہ ہے، صنعتیں چلیں گی تو بیروزگاری کم ہوگی، اس ملک کو عظیم بنانے کیلئے سب مل کر آگے بڑھ کر کام کرتے رہیں گے۔
وفاقی وزیر نے مزید کہا کہ آرمی چیف جنرل عاصم منیر ایک محبت وطن پاکستانی ہیں اور پاکستان کی سالمیت اور معیشت کیلئے اہم کردار ادا کر رہے ہیں، انہوں نے مزید کہا کہ آنے والے دنوں میں مزید خوشخبریاں آئیں گی، ایک ایسا پاکستان بنائیں گے جس کا خواب ہمارے بزرگوں نے دیکھا تھا۔
وفاقی وزیر نے مزید کہا کہ دنیا کے مالیاتی ادارے آج پاکستان کی تعریف کر رہے ہیں، سٹاک مارکیٹ بلندیوں کو چھو رہی ہے، تمام معاشی اشاریے عکاسی کرتے ہیں پاکستان اڑان بھر چکا ہے، پاک فوج کا قومی سلامتی کے ساتھ معاشی استحکام میں بھی اہم کردار ہے۔