تھیٹر سے بے حیائی کے خاتمے کے معاملے میں کسی کی سفارش قابل قبول نہیں ہے،عظمی بخاری

لاہور:وزیر اطلاعات پنجاب عظمیٰ بخاری نے کہا ہے کہ تھیٹر سے بے حیائی کے خاتمے کے معاملے میں کسی کی سفارش قابل قبول نہیں ہے۔ 
لاہور میں میڈیا سے گفتگو کرتے ہوئے عظمیٰ بخاری نے کہا کہمیرا مشن تھیٹر سے فحاشی اور بیہودگی کا خاتمہ کرنا ہے،تھیٹرز کا ماحول ایسا ہونا چاہیے جہاں فیملیز ڈرامے دیکھنے آئیں۔
صوبائی وزیر نے کہا کہ تھیٹر مالکان اور فنکاروں کو سدھرنے کے لیے ایک سال تک وقت دیا تھا اور تمام تھیٹر مالکان اور فنکاروں نے تھیٹر کو فیملی تھیٹر بنانے کی گارنٹی دی تھی، اس کے باوجود جن لوگوں نے ایس او پیز کی خلاف ورزی کی ان کے خلاف کارروائی کی جارہی ہے۔ 
عظمیٰ بخاری نے کہا کہ تھیٹر سے بے حیائی کے خاتمے کے معاملے میں کسی کی سفارش قابل قبول نہیں ہے،انہوں نے کہا کہ وہ کسی کی دھمکیوں کی پرواہ نہیں کرتیں اور نہ ہی کسی سے بلیک میل ہوں گی۔
انہوںنے مزید کہا کہ تھیٹر کے حوالے سے جلد نئی قانون سازی کی جارہی ہے اور آئندہ چند روز میں تھیٹر کی نئی پالیسی بن جائے گی،تھیٹر کی بہتری کے لیے اٹھائے گئے اقدامات پر عوامی مثبت ردعمل حوصلہ افزا ہے اور عوام بھی تھیٹر سے بے حیائی کا خاتمہ چاہتے ہیں۔