شہباز شریف نےبجلی کی قیمتیں کم کر کے نا ممکن کو ممکن کر دکھایا،وزیر دفاع

سیالکوٹ:وزیر دفاع خواجہ آصف نے کہا ہے کہ وزیر اعظم شہباز شریف نے بجلی کی قیمتیں کم کر کے ناممکن کو ممکن کر دکھایا ہے۔
سیالکوٹ میں میڈیا سے گفتگو کرتے ہوئےوزیر دفاع خواجہ آصف نے کہا کہ معشیت کو بحال کرنا، بجلی کو سستا کرنا کوئی چھوٹا ریلیف نہیں ہے، 16، 17 فیصد کی کمی ہے،انہوں نے کہا کہ آج سے سال، 2 سال پہلے یہ کوئی سوچ بھی نہیں سکتا تھا کہ ملک میں بجلی سستی ہو سکتی ہے۔
انہوں نے کہا کہ کسی کے وہم و گمان میں بھی نہیں تھا کہ افراط زر 38 فیصد سے کم ہوکر ڈیڑھ فیصد رہ جائے گی، یہ سب معجزے ہیں، امریکا کی سٹاک مارکیٹ کریش ہوئی ہے اور پاکستان کی سٹاک مارکیٹ ریکارڈ سطح پر چلی گئی ہے، یہ نیک نیتوں کا پھل ہے۔
پاکستان تحریک انصاف پر تنقید کرتے ہوئے وزیردفاع کا کہنا تھا کہ خیبرپختونخوا میں پی ٹی آئی کے وزیر کے خلاف 78 کروڑ کی کرپشن کے خلاف تحریک پیش کی گئی ہے، پی ٹی آئی والوں نے ایک دوسرے کو چور کہنا شروع کردیا ہے۔
وزیر دفاع نے کہا کہ ترقیاتی کام ہو رہے ہیں، کئی منصوبے چل رہے ہیں ، کیا آپ نے پی ٹی آئی کے دور میں یہ باتیں سنی تھیں؟ پنجاب کو دیکھ لیں، ہماری بیٹی دن رات صوبے کو چار چاند لگا رہی ہے، آپ اپنے شہر میں دیکھیں آپ کو کام ہوتے نظر آ رہے ہیں۔
خواجہ آصف نے کہا کہ تحریک عدم اعتماد کے ذریعے پی ٹی آئی سے اقتدار حاصل کیا تھا جس کے بعد پی ڈی ایم کے رہنماؤں نے مل کر پاکستان کے لیے امید کی کرن پیدا کی۔
ان کا کہنا تھا کہ بانی پی ٹی آئی جیب کترا تھا، جنرل فیض اور جنرل باجوہ سکیورٹی کی میٹنگ میں ہمیں بریفنگ دینے آتے تھے تو یہ ہمارے ساتھ نہیں بیٹھتا تھا، ابھی نندن والے واقعے کے بعد تین سکیورٹی میٹنگز ہوئیں، جنرل باجوہ کہتا رہا کہ آ کر میٹنگ کی صدارت کرو مگر یہ نہیں آیا۔
خواجہ آصف نے کہا کہ اب جب بانی پی ٹی آئی قیدی نمبر 804 ہیں اور کہتے ہیں کہ مجھے میٹنگ میں بلاؤ، کیا اس سے بڑا کوئی تضاد ہوسکتا ہے،انہوں نے مزید کہا کہ بانی پی ٹی آئی کو ایسے لوگوں کی ضرورت ہے جن کے پلے کچھ نہ ہو ، ایسے لوگ پارٹی میں شامل ہیں جنہیں گھر والے بھی ووٹ نہ دیں۔
خواجہ آصف کا مزید کہنا تھا کہ خیبرپختونخوا اوربلوچستان دہشت گردی کی زد میں ہیں، پاک فوج کے جوان قربانیاں دے کر ملک کی حفاظت کر رہے ہیں، تحریک انصاف ٹکڑوں میں تقسیم ہوچکی ہے، مسلم لیگ(ن)کےکارکن نوازشریف کا ہراول دستہ ہیں۔