ملکی برآمدات میں اضافہ حکومت کی اولین ترجیح ہے،وزیراعظم

وزیراعظم محمد شہبازشریف نے کہا ہے کہ ملکی آمدن میں برآمدات کے ذریعے اضافہ کرنا حکومت کی اولین ترجیحات میں شامل ہے۔

آج (جمعرات)وزیراعظم نے برآمدات سہولت سکیم کے حوالے سے جائزہ اجلاس کی صدارت کی۔

اجلاس میں برآمدات سہولت سکیم کومؤثربنانے اور برآمدی شعبے کا اس سے استفادہ یقینی بنانے کیلئے قائم کمیٹی کی عبوری سفارشات پیش کی گئیں۔

وزیراعظم نے کہا کہ برآمدی صنعتوں کے خام مال اور مشینری کی درآمد پر سہولت کیلئے اس سکیم کو مزید مؤثر بنانے کے حوالے سے کمیٹی کی سفارشات پر شعبے کے ماہرین سے مزید مشاورت یقینی بنائی جائے۔

وزیراعظم نے کمیٹی کو ہدایت کی کہ عبوری سفارشات کو حتمی شکل دے کر رپورٹ جلد پیش کی جائے۔

انہوں نے کہا کہ آئندہ بجٹ کی تیاری میں صنعتوں اور کاروباری تنظیموں سے مشاورت اور ان کی تجاویز کو بجٹ میں شامل کیا جائے۔مقامی صنعت کو لیول پلئینگ فیلڈ کی فراہمی یقینی بنائی جائے۔