روس کا یوکرین پر بیلسٹک میزائل سے حملہ،31 ہلاک متعدد زخمی

روس نے یوکرین کے شمالی شہر سومی کے مرکز میںبیلسٹک میزائل داغ دیے جس کے نتیجے میں کم از کم 31 افراد جاں بحق اور 84 زخمی ہو گئے۔
عالمی میڈیارپورٹس کے مطابق یوکرین پر یہ حملہ رواں رواں برس کا سب سے ہلاکت خیز حملہ بتایا گیا ہے۔
یوکرینی صدر ولادیمیر زیلنسکی نے روسی حملے کی شدید الفاظ میں مذمت کرتے ہوئے اسے دہشتگردی قرار دیا اور عالمی برادری سے روس کے خلاف سخت ردعمل کا مطالبہ کیا،انہوں نے حملے کی ویڈیو بھی شئیر کی جس میں حملے کے نتیجے میں ہلاک ہونے والوں کی لاشیں اور تباہ شدہ گاڑیاں دکھائی دے رہی ہیں۔
اپنے پیغام میں یوکرینی صدر نے مزید لکھا کہ یہ حملہ اس دوران ہوا جب لوگ گرجا گھروں میں عبادت کے لیے جا رہے تھے،انہوں نے امریکا اور یورپ سے روس پر سخت دباؤ ڈالنے کا مطالبہ بھی کیا ہے۔
یوکرینی صدر کا کہنا تھا کہ اس طرح کے حملوں میں عام شہریوں کو نقصان پہنچانا بدمعاشوں کا کام ہے،روس اسی قسم کا خوف پھیلانا چاہتا ہے یہی وجہ ہے جنگ کو طول دے رہا ہے، ان کا کہنا تھا کہ دونوں ممالک کے درمیان مذاکرات کبھی بیلسٹک میزائلوں اور فضائی بمباری کو نہیں روک سکتے۔