پہلگام فالس فلیگ آپریشن کا مقصد سیاسی مقبولیت کا حصول اور مسلم دشمنی ہے، طلال چوہدری

اسلام آباد:وزیر مملکت برائے داخلہ طلال چوہدری نے کہا ہے کہ پہلگام  فالس فلیگ آپریشنز کا مقصد بہتر انتخابی نتائج حاصل کرنا اور مسلمان دشمنی ہے،ان آپریشنز کے ذریعے مسلمانوں کی جائیدادوں کو نشانہ بنایا جا رہا ہے، اور یہ کارروائیاں مسلمانوں کے خلاف زمین تنگ کرنے کے مترادف ہیں۔
وزیر مملکت برائے داخلہ طلال چوہدری نے پہلگام میں ہونے والے حالیہ دہشت گرد حملے کا ذکر کرتے ہوئے کہا کہ اس کے بعد مقبوضہ کشمیر میں مسلمانوں کی جائیدادیں گرا دی جا رہی ہیں اور جعلی پولیس مقابلے ہو رہے ہیں۔ 
پریس کانفرنس میں انہوں نے مزید کہا کہ بھارتی وزیراعظم نریندر مودی پہلے بھی دھمکی دے چکے ہیں کہ وہ پانی بند کر دیں گے، اور حالیہ فالس فلیگ آپریشن سے انڈیا نے یکطرفہ طور پر پانی کے معاہدے کو معطل کر دیا ہے،انہوں نے بھارتی میڈیا کی تنقید کو مسترد کرتے ہوئے کہا کہ پانی روکنے کے بجائے دریائے جہلم میں پانی چھوڑ دیا گیا ہے اور اس وقت 6 سے 7 فٹ پانی میں اضافہ ہو چکا ہے۔
وزیر مملکت طلال چوہدری نے خبردار کیا کہ اگر بھارت نے کوئی غلطی کی تو پاکستان کا جواب تاریخ رقم کرے گا، انہوں نے کہا کہ اگر بھارت نے جارحیت کا سوچا تو پاکستان کا جواب ایسی جارحیت کا ہمیشہ خاتمہ کرے گا۔ طلال چوہدری نے کہا کہ پاکستان امن چاہتا ہے، مگر وہ کسی بھی دھمکی سے نہیں ڈرتا۔
انہوں نے دو قومی نظریے کی اہمیت پر بھی زور دیا اور کہا کہ ہر گزرتے دن کے ساتھ یہ نظریہ سچا ثابت ہو رہا ہے کہ پاکستان اور بھارت دو الگ قومیں ہیں،ان کا مزید کہنا تھا کہ یہ نظریہ پاکستان کے وجود کا بنیادی سبب ہے اور اگر یہ نظریہ نہ ہوتا تو آج پاکستان کے مسلمانوں پر بھی زمین تنگ ہو چکی ہوتی۔
طلال چوہدری نے سوال اٹھایا کہ پہلگام میں ایک گھنٹہ دہشت گردی جاری رہی اور کوئی فوراً کارروائی کے لیے نہیں پہنچا، لیکن واقعے کے 10 منٹ بعد ہی ایف آئی آر درج کر دی گئی جس میں لکھا گیا کہ دہشت گرد کہاں سے آئے تھے۔ فوراً ہی پاکستان کے خلاف اقدامات کیے گئے، جس سے ان کے کردار کی حقیقت سامنے آتی ہے۔
طلال چوہدری نے کہا ہے کہ ہم نے کلبھوشن یادیو کو پاکستان میں پکڑا مگر ہمارا کوئی آفیسر اس طرح انڈیا میں نہیں پکڑا گیا ہے۔
 دہشتگردی ایک ناسور ہے چاہے کسی بھی ملک میں ہو مگر کینیڈا اور امریکا جیسے ممالک نے بھی اعتراف کیا ہے کہ ریاستی سرپرستی میں دہشتگردی بھارت سے آرہی ہے۔