وزیراعظم  کی زیر صدارت  مشترکہ مفادات کونسل (سی سی آئی) کا اجلاس شروع

وزیراعظم  شہباز  شریف کی زیر صدارت  مشترکہ مفادات کونسل (سی سی آئی) کا اجلاس شروع  ہوگیا۔

8  رکنی کونسل کےارکان میں چاروں صوبائی وزرائے اعلیٰ سمیت وفاقی وزرا  اسحاق ڈار، خواجہ  آصف  اور امیر مقام شامل ہیں۔کونسل کے اجلاس میں 25 افراد خصوصی دعوت پر شرکت کر رہے ہیں۔

اجلاس میں سال 22-2021 کی کونسل کی سالانہ رپورٹ کا جائزہ لیا جائےگا۔ اجلاس میں 23-2022 کی سالانہ رپورٹ کے جائزے سمیت 24-2023 کی سالانہ رپورٹ کی منظوری بھی دی جائے گی۔

مشترکہ مفادات کونسل کےاجلاس میں 6 نکاتی ایجنڈے پرغورکیاجائےگا۔کونسل نئی نہریں نکالنے کے منصوبے  پر حکومت سندھ کے ایجنڈا آئٹم پر غور کرےگی۔

اجلاس میں سیکرٹریٹ ملازمین کی بھرتیوں کے قواعدکی منظوری کا بھی امکان ہے۔کونسل نیپرا کی 3 سال کی سالانہ رپورٹس کا بھی جائزہ لےگی۔

وزیراعظم سے مریم نواز، مراد علی شاہ، سرفرازبگٹی اور علی امین گنڈاپور نے ملاقات کی۔

اجلاس سے قبل وزیراعظم شہباز شریف  سے چاروں صوبوں کے وزرائے اعلیٰ کی ملاقات ہوئی۔

خیال رہےکہ یہ اجلاس 2 مئی کو ہونا تھا لیکن حکومت سندھ کی گزارش پر وزیراعظم نے آج اجلاس طلب کیا۔