فوج اور سیاسی رہنماؤں کا دشمن کی کسی بھی جارحیت کا منہ توڑ جواب دینے کے عزم کا اعادہ

وزیراطلاعات عطاء اللّٰہ تارڑ اور ڈی جی آئی ایس پی آر جنرل احمد شریف چوہدری نے پاک بھارت صورتحال پر سیاسی رہنماؤں کو بریفنگ دیتے ہوئے دشمن کی کسی بھی جارحیت کا منہ توڑ جواب دینے کے عزم کا اعادہ کیا ہے۔

وفاقی وزیراطلاعات عطا اللہ تارڑ اور ڈی جی آئی ایس پی آر نے پاک بھارت صورتحال پر سیاسی رہنماؤں کو بریفنگ دی۔ اجلاس میں مسلم لیگ ن، پیپلزپارٹی،ایم کیو ایم ، جے یوآئی،سابق وزیراعظم آزاد کشمیر ، بلوچستان عوامی پارٹی سمیت دیگر رہنماؤں نے شرکت کی البتہ تحریک انصاف نے پاک بھارت صورتحال پر حکومتی بریفنگ میں شرکت نہ کرنے کا فیصلہ کیا۔

میڈیا رپورٹس کے مطابق ان کیمرا سیشن میں ڈی جی آئی ایس پی آر نے سیاسی رہنماؤں کو پاک فوج کی تیاریوں سے جبکہ وزیر اطلاعات نے سیاسی قائدین کو حکومتی سفارتی اقدامات سے آگاہ کیا۔

ڈی جی آئی ایس پی آر  ڈی جی آئی ایس پی آر لیفٹننٹ جنرل احمد شریف چوہدری نے کہا کہ جارحیت مسلط کی گئی تو دشمن کو منہ توڑ جواب دینے کے لیے تیار ہیں۔ پاکستان پرامن ملک ہے اور خطے میں امن چاہتا ہے۔

بریفنگ میں پہلگام واقعے اور بھارتی جنگی جارحیت کے خلاف قومی اسمبلی میں قرارداد لانے کا فیصلہ کیا گیا۔

متفقہ قرارداد آج شام قومی اسمبلی کے اجلاس میں لائی جائے گی، اجلاس میں ارکان اس اہم ترین ایشو پر اظہار خیال بھی کریں گے۔ بھارتی جارحیت اور ریاستی سرپرستی میں کراس بارڈر ٹیررازم پر کھل کر بات کی جائے گی اور حکومت کی طرف سے قومی بیانیہ اور پالیسی بھی وضع کی جائے گی۔ جبکہ سندھ طاس معاہدے کی خلاف ورزی پر حکومت اپنی حکمت عملی سے بھی آگاہ کرے گی۔