معرکہ حق: افواجِ پاکستان سے اظہارِ یکجہتی کے لیے یوحنا آباد میں ریلی کا انعقاد،عوام کی بھر پور شرکت

لاہور:آپریشن بنیان مرصوص میں شاندار کامیابی پر افواجِ پاکستان سے اظہارِ یکجہتی کے لیے یوحنا آباد سے ایک ریلی نکالی گئی جس کی قیادت سابق رکنِ پنجاب اسمبلی شکیل مارکس کھوکھر نے کی۔
اس موقع پر شرکاء نے افواجِ پاکستان کی پیشہ ورانہ صلاحیتوں اور قربانیوں پر بھرپور اعتماد کا اظہار کیا اور ان کی خدمات کو خراجِ تحسین پیش کیا۔
ریلی کے دوران پاکستان اور اس کی افواج کی سلامتی اور ترقی کے لیے خصوصی دعائیں کی گئیں،شرکاء نے "پاکستان زندہ باد" اور "پاک فوج زندہ باد" کے فلک شگاف نعرے لگا کر اپنے وطن سے محبت کا اظہار کیا۔
مسیحی برادری کے افراد کی بڑی تعداد نے ریلی میں جوش و خروش سے شرکت کی، جو قومی یکجہتی اور باہمی ہم آہنگی کی ایک خوبصورت مثال تھی۔