حماس کے سابق سربراہ یحیٰ السنوار کے دوسرے بھائی زکریا السنوار بھی اسرائیلی حملے میں شہید

اسرائیلی افواج نے غزہ کے جنوبی علاقے خان یونس میں ایک خیمہ بستی کو نشانہ بنایا، جس میں حماس کے سابق سربراہ یحیٰ السنوار کے دوسرے بھائی زکریا السنوار شہید ہو گئے۔

بین الاقوامی خبر ایجنسیوں کے مطابق زکریا السنوار اس وقت ایک خیمے میں مقیم تھے جہاں وہ دیگر بے گھر فلسطینی خاندانوں کے ساتھ پناہ لیے ہوئے تھے، اسرائیلی بمباری کے نتیجے میں خواتین اور تین معصوم بچے بھی شہید ہو گئے، جبکہ خیمہ بستی کے کئی حصے آگ کی لپیٹ میں آ گئے۔

زکریا السنوار غزہ کی اسلامی یونیورسٹی میں تاریخ کے لیکچرار کے طور پر خدمات انجام دے رہے تھے۔

اتوار کے روز کیے گئے اسرائیلی حملے میں پانچ صحافیوں کی شہادت کی بھی تصدیق ہوئی ہے، جس سے میڈیا ورکرز کی سلامتی کے حوالے سے شدید خدشات نے جنم لیا ہے۔

حماس کی جانب سے زکریا السنوار کی شہادت سے متعلق خبروں کی نہ تو تصدیق کی گئی اور نہ ہی تردید، جبکہ اسرائیلی حکام نے بھی تاحال اس حملے پر کوئی تبصرہ نہیں کیا۔

یاد رہے کہ یحییٰ السنوار کے خاندان کے کئی افراد پہلے بھی اسرائیلی حملوں کا نشانہ بن چکے ہیں، اور تازہ واقعہ اس طویل اور خونی تنازعے کی ایک اور المناک کڑی بن کر سامنے آیا ہے۔