ملک بھر میں آج سے مون سون بارشوں کا آغاز

تفصیلات کے مطابق وفاقی دارالحکومت سمیت پنجاب کے مختلف علاقوں میں مون سون کی بارشیں شروع ہوگئی ہیں۔محکمہ موسمیات کے مطابق ہفتے سے شروع ہونے والی بارشوں کا یہ سلسلہ پیر تک ملک کے دوسرے حصوں میں پھیل جائےگا،  مون سون ہوائیں آج شدت کے ساتھ کشمیر و شمال مشرقی پنجاب میں داخل ہوچکی ہیں۔  اس سلسلےکےتحت خیبر پختون خوا، گلگت بلتستان اور کشمیر کے ندی نالوں میں طغیانی اور پہاڑی علاقوں میں لینڈ سلائیڈنگ کا اندیشہ ہے۔  

صوبائی دارالحکومت لاہور میں   محکمہ موسمیات نے آئندہ ہفتے کے دوران موسلادھار بارش کی پیشگوئی کی ہے۔ دوسری جانب راولپنڈی، اسلام آباد اور گرد و نواح میں گرج چمک کے ساتھ موسلادھار بارش سے  موسم خوشگوار ہوگیا، جڑواں شہروں میں مجموعی طور پر 27 ملی میٹر بارش ریکارڈ کی گئی جس کے باعث نالہ لئی میں پانی کی سطح بلند ہونا شروع ہوگئی اور 11 فٹ سے تجاوز کرگئی۔ مزید بارش کی پیش گوئی کے باعث پانی کی سطح بڑھنے کا امکان ہے۔ راولپنڈی میں شدید بارش سے سڑکوں پر پانی جمع ہوگیا اور واسا کا عملہ نکاسی آب میں مصروف ہے۔ فلڈ کنٹرول روم نے تمام اداروں کو آبی آفت سے نمٹنے کے لیے رین الرٹ جاری کردیا۔

دوسری جانب محکمہ موسمیات کا کہنا ہے کہ کراچی میں 15 جولائی سے مون سون کی پہلی  بارش متوقع ہے ۔ 15سے 17جولائی مون سون کا پہلا اسپیل کراچی میں برس سکتا ہے، کراچی میں آئندہ چوبیس گھنٹوں کے دوران موسم ابر آلود رہے گا۔ محکمہ موسمیات کے مطابق کر اچی میں 10سے22 ملی میٹر بارش ہوسکتی ہے، ہوا کا کم دباؤ خلیج بنگال کے شمال مغرب میں 11جولائی کو بن سکتاہے، مون سون کی نمی والی ہوائیں گجرات کے راستے پاکستان میں داخل ہونگی۔