پی ایس ایل فائنل میں پاک بحریہ کے بہادر سپوتوں کو زبردست خراج تحسین پیش ،اعلیٰ شخصیات کی شرکت

لاہور:پاکستان سپر لیگ ( پی ایس ایل ) کے فائنل میچ کے دوران ایک شاندار تقریب کا انعقاد کیا گیا جس میں پاک بحریہ کے بہادر سپوتوں کو زبردست و خراجِ تحسین پیش کیا گیا۔
قذافی اسٹیڈیم لاہور میں کھیلے جا رہے پاکستان سپر لیگ 10 کے فائنل میچ میں پاکستان بحریہ کے سربراہ ایڈمرل نوید اشرف قذافی اسٹیڈیم پہنچے جہاں چئیرمین پاکستان کرکٹ بورڈ ( پی سی بی ) محسن نقوی نے انکا خیر مقدم کیا۔
 اس موقع پروفاقی وزیر خزانہ محمد اورنگزیب بھی اس یادگار موقع پر اسٹیڈیم میں موجود تھے، تقریب میں سابق چیئرمین پاکستان کرکٹ بورڈ نجم سیٹھی ،امریکہ کی قائم مقام سفیر نیٹلی بیکرسمیت سیاسی اکابرین اور اعلیٰ سول و عسکری حکام بھی اسٹیڈیم میں موجود تھے۔
تقریب کے دوران معروف سنگر ندیم عباس اور ابرار الحق نے اپنی آواز کا جادو جگا کر شائقین کو محظوظ کیا۔ اسٹیڈیم "پاک فوج زندہ باد" کے فلک شگاف نعروں سے گونج اٹھا۔
اس موقع پر چیئرمین پی سی بی محسن نقوی کا کہنا تھا کہ پاک بحریہ کی بھرپور تیاریوں کے باعث دشمن ہماری سمندری حدود پر حملہ کرنے کی جرات نہ کرسکا، زندہ قومیں اپنے ہیروز کو ہمیشہ یاد رکھتی ہیں، 10 مئی کا دن پاکستان کی دفاعی تاریخ کا روشن ترین باب ہے۔
تقریب کے اختتام پر شاندار آتش بازی کا مظاہرہ کیا گیا جس نے آسمان کو رنگ برنگی روشنیوں سے جگمگا دیا۔پی ایس ایل 10 کا یہ فائنل نہ صرف کرکٹ کے جذبے کا جشن تھا بلکہ ایک قومی یکجہتی کا مظاہرہ بھی ثابت ہوا۔