استنبول: وزیراعظم شہبازشریف کی ترک صدر سے ملاقات، علاقائی اور عالمی امور پر تبادلہ خیال

استنبول:وزیراعظم شہباز شریف نے استنبول میں ترک صدر رجب طیب اردوان سے ملاقات کی ہے جس میں دو طرفہ تعلقات اور عالمی امور پر تبادلہ خیال کیا گیا۔
تفصیلات کے مطابق استنبول میں صدارتی محل آمد پر ترک صدر رجب طیب اردوان نے وزیراعظم شہباز شریف کو خوش آمدید کہا جبکہ وزیراعظم نے ترک صدر سے وفد کا تعارف کرایا۔
 ملاقات میں ترکیہ اور پاکستان کے درمیان دو طرفہ تعلقات کے مختلف پہلوؤں کا جائزہ لیے جانے کے علاوہ دونوں ممالک کے درمیان قائم اعلیٰ سطحی سٹریٹجک کوآپریشن کونسل کے دائرہ کار میں تعاون کے حوالے سے بھی گفتگو ہوگی،اس کے علاوہ دونوں رہنماؤں کی وفود کی سطح پر بھی ملاقات ہوئی۔
 وزیراعظم آفس سے جاری بیان کے مطابق دوطرفہ تعلقات، دہشت گردی کے خلاف جنگ سمیت علاقائی اور عالمی امور پر تبادلہ خیال کیا گیا۔
نائب وزیر اعظم اور وزیر خارجہ اسحاق ڈار، فیلڈ مارشل سید عاصم منیر، وزیر اطلاعات عطا تارڑ اور معاون خصوصی طارق فاطمی بھی ملاقات میں شریک تھے۔
ترک صدر اردوان وزیر اعظم شہباز شریف اور پاکستانی وفد کے اعزاز میں عشائیہ بھی دیں گے۔ 
اس سے قبل وزیر اعظم شہباز شریف چار ملکی دورے کے پہلے مرحلے میں ترکیہ کے دارالحکومت استبول پہنچے جہاں ایئر پورٹ پر ترکیہ کے وزیردفاع نے وزیراعظم اور ان کے وفد کا شاندار استقبال کیا، پاکستان کے سفیر بھی ان کے استقبال کے لیے موجود تھے۔