یورپی ملک مالٹا کا اگلے ماہ فلسطین کو الگ ریاست تسلیم کرنے کا اعلان

مالٹا سٹی:یورپی ملک مالٹا نے اگلے ماہ فلسطین کو الگ ریاست کو تسلیم کرنے کا اعلان کر دیا۔
غیرملکی میڈیا کے مطابق ایک سیاسی تقریب کے دوران مالٹا کے وزیر اعظم رابرٹ ابیلا  کا کہنا تھا کہ غزہ میں انسانیت سوز المیے پر خاموش نہیں رہ سکتے ، فلسطین کو ریاست تسلیم کرنا اخلاقی ذمہ داری ہے ،۔
اس تقریب میں انہوںنے اعلان کیا کہ اسرائیل فلسطین تنازع پر 20 جون کو اقوام متحدہ کانفرنس کے بعد فلسطینی ریاست کو تسلیم کر لیں گے۔
خیال رہے مالٹا پچھلے سال اپریل میں فلسطین کو اقوام متحدہ میں مکمل رکنیت دینے کے حق میں سکیورٹی کونسل میں ووٹ دے چکا ہے۔
تاہم ابھی تک اس نے باضابطہ فلسطینی ریاست کو تسلیم نہیں کیا تھا۔
اب تک اقوام متحدہ کے 193 میں سے 147 رکن ممالک فلسطین کو خودمختار ریاست کے طور پر تسلیم کر چکے ہیں۔ گزشتہ برس آرمینیا، سلووینیا، آئرلینڈ، ناروے، اسپین، بہاماس، ٹرینیڈاڈ و ٹوباگو، جمیکا اور بارباڈوس نے بھی فلسطین کو تسلیم کیا تھا۔
تاہم فلسطینی ریاست کو بڑھتی ہوئی بین الاقوامی حمایت کے باوجود امریکا، آسٹریلیا، برطانیہ اور جرمنی جیسے کئی بڑے مغربی ممالک نے ابھی تک اسے تسلیم نہیں کیا ہے۔
گزشتہ ماہ فرانسیسی صدر ایمانول میکرون نے یہ امکان ظاہر کیا تھا کہ فرانس آنے والے مہینوں میں فلسطینی ریاست کو تسلیم کر سکتا ہے۔