پنجاب:سی ٹی ڈی کی مختلف اضلاع میں کارروائیاں، 34 خطرناک دہشت گرد گرفتار

لاہور:محکمہ انسداد دہشتگردی(سی ٹی ڈی) پنجاب نے انٹیلی جنس اطلاعات کی بنیاد پر صوبے کے مختلف شہروں میں کارروائیاں کرتے ہوئے 34 مبینہ دہشت گردوں کو گرفتار کر لیا ہے۔ 

ترجمان سی ٹی ڈی کے مطابق گرفتار ملزمان میں فتنہ الخوارج سے تعلق رکھنے والے خطرناک دہشت گرد بھی شامل ہیں۔

ترجمان کے مطابق کارروائیاں لاہور، بہاولپور، ننکانہ صاحب، راولپنڈی،جہلم ،نارووال سمیت دیگر شہروں میں کی گئیں۔ لاہور سے 2 جبکہ بہاولپور سے 1 انتہائی مطلوب دہشت گرد کو حراست میں لیا گیا۔

ترجمان نے بتایا کہ گرفتار دہشت گردوں کی شناخت محمد اشفاق، اسماعیل خان، نصیر اللہ، ارشاد اللہ، محمد ثاقب، محمد اسجد، محمد شعیب، عزیز اللہ، محبوب شاہ، غفران، عطا محمد، سلیمان معاویہ اور دیگر کے ناموں سے ہوئی ہے۔

ترجما ن نے مزید بتایا کہ گرفتار دہشت گردوں کے قبضے سے دھماکہ خیز مواد، ایک ہینڈ گرنیڈ، 18 ڈیٹونیٹرز اور دیگر خطرناک اشیاء برآمد کی گئی ہیں۔
حکام کا کہنا ہے کہ یہ دہشت گرد قانون نافذ کرنے والے اداروں پر حملے کی منصوبہ بندی مکمل کر چکے تھے، تاہم بروقت کارروائی سے ایک بڑا سانحہ ٹال دیا گیا۔

ترجمان سی ٹی ڈی کے مطابق رواں ماہ کے دوران پنجاب بھر میں 5045 کومبنگ آپریشنز کیے گئے جن کے نتیجے میں 604 مشتبہ افراد کو گرفتار کیا گیا۔

ترجمان سی ٹی ڈی کا کہنا ہے کہ محکمہ "محفوظ پنجاب" کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہے۔