کوئٹہ :مغربی بائی پاس کے قریب گاڑی میں دھماکا، ایک شخص جاں بحق، 2 زخمی

کوئٹہ: صوبائی دارالحکومت کوئٹہ میں مغربی بائی پاس کے قریب ایک گاڑی میں دھماکا ہوا ہے جس کے نتیجے میں ایک شخص جاں بحق جبکہ دو افراد زخمی ہو گئے ہیں۔

پولیس کے مطابق اتوار کی شب کوئٹہ کے علاقے مغربی بائی پاس بروری چوک کراس کے قریب ایک گاڑی گزر رہی تھی کہ اس میں اچانک پراسرار دھماکا ہوا، جس کے نتیجے میں گاڑی میں بیٹھا ایک شخص موقع پر ہی جاں بحق ہوگیا جبکہ 2 افراد زخمی ہوگئے۔

بم ڈسپوزل ٹیم موقع پر پہنچ گئی ہے، پولیس اور دیگر قانون نافذ کرنے والے اداروں نے جائے دھماکا کو گھیرے میں لے لیا ہے، دھماکے کی نوعیت کا تعین کیا جا رہا ہے۔

دوسری جانب جاں بحق اور زخمیوں کو قریبی اسپتال منتقل کر دیا گیا ہےجہاں ان کو بہتر طبی امداد دی جا رہی ہے۔

خیال رہے کہ گزشتہ روز بھی کوئٹہ کے نواحی علاقے کلی منگلا میں بم دھماکے  سے قبائلی رہنما عبدالسلام بازئی اپنے بھائی سمیت جاں بحق  اور 6 افراد زخمی ہوئے تھے۔