سرکاری ملازمین کی تنخواہوں میں اضافےسے متعلق پنجاب اسمبلی میں قرارداد جمع

لاہور:پنجاب اسمبلی میں سرکاری ملازمین کی تنخواہوں میں اضافے کے حوالے سے قرارداد جمع کرادی گئی ۔
قرارداد پیپلز پارٹی کے پارلیمانی لیڈر علی حیدر گیلانی نے جمع کرائی۔
تفصیلات کے مطابق حکومت کی اتحادی جماعت پیپلزپارٹی نے سرکاری ملازمین کی تنخواہوں میں اضافے، ایڈ ہاک الاؤنسز کو بنیادی تنخواہ میں ضم کرنے اور ہاؤس رینٹ الاؤنس میں اضافے کے لیے پنجاب اسمبلی میں قرارداد جمع کروا دی۔
جمع کروائی قرارداد میں مطالبہ کیا گیا ہے کہ موجودہ شدید مہنگائی اور معاشی دباؤ کے پیش نظر سرکاری ملازمین کی تنخواہوں میں فوری معقول اضافہ کیا جائے۔
جبکہ حکومت کی جانب سے کیے گئے وعدوں پر عملدرآمد کرتے ہوئے سابقہ ایڈ ہاک الاؤنسز کو بنیادی تنخواہ میں ضم کیا جائے۔
متن کے مطابق ملازمین کو ملنے والے ہاؤس رینٹ الاؤنس کو غیر منجمد کیا جائے، ملازمین کے لیے موجودہ کرایوں کی مارکیٹ ویلیو کے مطابق دوبارہ مقرر کیا جائے، مستقبل میں مہنگائی کے تناسب سے تنخواہوں میں باقاعدگی سے نظرثانی کی جائے۔