خیبر پختونخوا :نئے مالی سال کے بجٹ کا کل حجم 2 ہزار 70 ارب روپے ہونے کا امکان

پشاور: نئے مالی سال 2025-26 کے لیے خیبر پختونخوا بجٹ کا کل حجم 2 ہزار 70 ارب روپے سے زائد ہونے کا امکان ہے۔

ذرائع محکمہ خزانہ کے مطابق مجموعی ترقیاتی بجٹ میں 40 فیصد اضافہ اور 500 تک نئی اسکیمیں شامل ہوں گی، جبکہ اگلے مالی سال کے دوران 20 سے 22 فیصد تک نئی اسکیمیں شامل ہوں گی۔

صوبائی بجٹ میں نئے ترقیاتی منصوبوں کا دورانیہ 3 سال سے کم ہو گا۔ اور اگلے مالی سال کے بجٹ کے فنانس بل میں ٹوبیکو ٹیکس میں 10 فیصد اضافہ زیر غور ہے۔
ذرائع کے مطابق کے پی حکومت کا تنخواہوں میں 10 اور پنشن میں 7 فیصد اضافہ کرنے کا امکان ہے۔ 

ذرائع کے مطابق بجٹ میں نان سیلری کیلئے 520 ارب روپے رکھنے کی تجویز ہے، کے پی حکومت کو این ایف سی کی مد میں 11 سو 48 ارب روپے ملنے کی توقع ہے۔ 

ذرائع کے مطابق نیٹ ہائیڈل پرافٹ مد میں 108 ارب اور آئل اینڈ گیس مد میں 55 ارب ملنے کا امکان ہے،اسی طرح ہاؤسنگ سوسائٹیز کے اراضی کے انتقالات کی فیس 2 سے کم کر کے ایک فیصد پر لانے کی تجویز ہے۔

صوبائی محکمہ خزانہ کے مطابق صوبائی بجٹ 13 جون کو کابینہ سے منظوری کے بعد پیش کیا جائے گا۔