جوہری تنصیبات پر حملے،ایرانی پارلیمنٹ نے آبنائے ہرمز بند کرنے کی منظوری دے دی

تہران: ایران کی جوہری تنصیبات پرا مریکی فضائی حملوں کے بعد ایرانی پارلیمنٹ نے آبنائے ہرمز کو بند کرنے کی منظوری دے دی۔

ایرانی میڈیا کے مطابق ایران کی اعلیٰ سیکیورٹی قیادت اورسپریم نیشنل سیکیورٹی کونسل پارلیمنٹ کے فیصلے کی حتمی منظوری دے گی۔
ایران نے یہ قدم خطے میں بڑھتی کشیدگی، امریکی پابندیوں اور اسرائیل کے ساتھ حالیہ تصادم کے تناظر میں اٹھایا گیا ہے۔

صرف 33کلو میٹر چوڑی آبنائے ہرمز کے ایک طرف خلیج فارس اور دوسری طرف خلیج عمان ہے،سعودی عرب، متحدہ عرب امارات، کویت اور  ایران کی جانب سے اسی راستے سے تیل دیگر  ملکوں کو پہنچایا جاتا ہے، ان تمام ممالک سے مجموعی عالمی تیل کی رسد کا پانچواں حصہ اسی چوک پوائنٹ سے گزر تا ہے۔

عالمی رپورٹس کے مطابق گزشتہ سال آبنائے ہرمز سے روزانہ 20 ملین بیرل تیل کی ترسیل ہوئی جو عالمی پیٹرولیم استعمال کا 20 فیصد ہے جبکہ ہر ماہ تقریباً 3 ہزار بحری جہاز آبنائے ہرمز سے گزرتے ہیں۔

واضح رہے کہ امریکی حملوںکے بعد ایرانی حکام نے آج صبح آبنائے ہُرمز بند کرنے کا اعلان کیا تھا اور خبردار کیا تھا کہ یورپی یونین کا کوئی بھی بحری بیڑہ اب یورپ تک نہیں پہنچ سکے گا۔