ٹرمپ نے ایک بار پھر فیلڈ مارشل عاصم منیر کو سراہا ، متاثر کن شخصیت قرار دے دیا

امریکی صدر ڈونلڈ ٹرمپ نے نیٹو اجلاس کے بعد منعقدہ پریس کانفرنس میں ایک بار پھر پاکستان کے فیلڈ مارشل جنرل سید عاصم منیر کی تعریف کرتے ہوئے انہیں ایک "انتہائی متاثر کن شخصیت" قرار دیا ہے۔

صدر ٹرمپ نے کہا کہ پاکستان اور بھارت کے درمیان جوہری تنازع کے امکانات کے باوجود، ان کی کوششوں سے دونوں ممالک کے درمیان جنگ بندی ممکن ہوئی۔ "میں نے کئی بار فون کر کے کہا، جنگ نہیں، تجارت کرو"، ٹرمپ نے واضح انداز میں کہا۔

انہوں نے فیلڈ مارشل عاصم منیر سے اپنی حالیہ ملاقات کا حوالہ دیتے ہوئے کہا:

"فیلڈ مارشل عاصم منیر ایک شاندار انسان ہیں، میں ان سے وائٹ ہاؤس میں ملا، ان کی شخصیت، سوچ اور امن کی خواہش واقعی متاثر کن ہے۔"

صدر ٹرمپ نے دعویٰ کیا کہ ان کی کوششوں سے نہ صرف پاکستان اور بھارت بلکہ اسرائیل و ایران، راونڈا اور کانگو کے درمیان بھی کشیدگی میں کمی آئی۔

یاد رہے کہ چند روز قبل فیلڈ مارشل عاصم منیر نے وائٹ ہاؤس کا دورہ کیا تھا، جہاں امریکی صدر نے ان کے اعزاز میں ظہرانہ بھی دیا۔ اس ملاقات میں جنوبی ایشیاء کی سیکیورٹی صورت حال کے ساتھ ساتھ ایران اور مشرق وسطیٰ کی کشیدگی پر بھی گفتگو ہوئی۔

صدر ٹرمپ نے اس موقع پر فیلڈ مارشل کو بھارت کے ساتھ کشیدگی کم کرنے اور امن کے فروغ پر "خصوصی شکریہ" ادا کیا تھا۔