چین نے امریکا سے تجارتی معاہدے کی تصدیق کر دی، تجارتی تعلقات میں بہتری کی امید

چین نے امریکا کے ساتھ تجارتی معاہدے کی تصدیق کر دی ہے۔ چینی وزارت تجارت کے ترجمان نے بیان میں کہا کہ معاہدے کے تحت امریکا تجارت پر عائد بعض پابندیاں ختم کرے گا، جبکہ چین برآمدی کنٹرولز کے تحت اشیاء کا جائزہ لے کر ان کی منظوری دے گا۔

ترجمان نے مزید بتایا کہ دونوں ممالک نے جنیوا معاہدے کے مؤثر نفاذ کے لیے ایک فریم ورک پر بھی اتفاق کیا ہے، جس کی تفصیلات حالیہ لندن مذاکرات کے بعد طے پا گئی ہیں۔

چینی وزارت تجارت کا کہنا ہے کہ اس معاہدے سے امریکا اور چین کے درمیان اقتصادی و تجارتی روابط مزید مستحکم ہوں گے، اور امید ہے کہ دونوں ممالک ایک دوسرے کے مزید قریب آئیں گے۔ انہوں نے کہا کہ تعلقات کو صحت مند، مستحکم اور پائیدار انداز میں آگے بڑھانے کے لیے یہ ایک مثبت پیش رفت ہے۔

واضح رہے کہ گزشتہ روز وائٹ ہاؤس میں ایک تقریب کے دوران امریکی صدر ڈونلڈ ٹرمپ نے چین کے ساتھ تجارتی معاہدے پر دستخط کرنے کا باضابطہ اعلان کیا تھا۔