ایران نے امریکا سے آئندہ ہفتے مذاکرات کی خبروں کو مسترد کر دیا

ایران کے وزیر خارجہ عباس عراقچی نے امریکی صدر ڈونلڈ ٹرمپ کے ایران سے آئندہ ہفتے مذاکرات کے دعوے کی سختی سے تردید کرتے ہوئے کہا ہے کہ فی الحال امریکا سے دوبارہ مذاکرات کا کوئی فیصلہ نہیں ہوا۔ ان کا کہنا تھا کہ مذاکرات کی میز خود اسرائیل نے الٹ دی ہے۔

عباس عراقچی نے واضح کیا کہ امریکا کے ساتھ نئے مذاکرات شروع کرنے کے حوالے سے نہ کوئی معاہدہ طے پایا ہے، نہ کوئی انتظام یا بات چیت ہوئی ہے۔ ان کے مطابق مذاکرات کے آغاز کے لیے کوئی منصوبہ بھی زیر غور نہیں۔

انہوں نے مزید کہا کہ ایران اس وقت جائزہ لے رہا ہے کہ امریکا سے سفارت کاری ملکی مفاد میں ہے یا نہیں، اور حالات کا باریک بینی سے مطالعہ کیا جا رہا ہے۔

یاد رہے کہ حالیہ نیٹو سمٹ کے دوران امریکی صدر ڈونلڈ ٹرمپ نے صحافیوں سے گفتگو کرتے ہوئے دعویٰ کیا تھا کہ ایران-اسرائیل تنازع اب ختم ہو چکا ہے، دونوں ممالک جنگ سے تھک چکے ہیں اور جنگ کے خاتمے سے مطمئن نظر آتے ہیں۔

صدر ٹرمپ نے کہا تھا کہ اگلے ہفتے ایران سے بات چیت ہوگی اور ممکن ہے کہ معاہدے پر دستخط بھی ہو جائیں۔ تاہم انہوں نے مزید کہا کہ ان کے لیے معاہدہ ضروری نہیں، کیونکہ ایران جنگ لڑ چکا ہے اور اب وہ واپس معمول کی زندگی کی طرف جا رہا ہے۔ "مجھے اس بات سے کوئی فرق نہیں پڑتا کہ معاہدہ ہوتا ہے یا نہیں"، صدر ٹرمپ کا کہنا تھا۔