لاہور: شاہدرہ میں مکان کی چھت گرنے سے2کمسن بچے جاں بحق،3 افراد زخمی

لاہور: صوبائی دارالحکومت لاہور کے علاقے شاہدرہ میں مکان کی چھت گرنے سے 2 کمسن بچے جاں بحق جبکہ 3 افرادزخمی ہو گئے۔

تفصیلات کے مطابق یہ افسوسناک واقعہ شاہدرہ کے علاقے عباس نگر میں پیش آیا، جہاں ایک مکان کی چھت گرنے سے دو کمسن بچے جاں بحق جبکہ تین افراد زخمی ہو گئے۔ 

پولیس کے مطابق حادثہ عتیق نامی شہری کے گھر پیش آیا، جہاں ایک ہی خاندان کے پانچ افراد ملبے تلے دب گئے۔

جاں بحق ہونے والے بچوں کی شناخت 9 سالہ عائشہ اور 11 سالہ حسنین کے نام سے ہوئی ہے، جبکہ زخمیوں میں 35 سالہ عتیق، 30 سالہ سمیرا اور 6 سالہ سلیمان شامل ہیں۔ حادثے کے وقت تمام افراد گھر کے اندر موجود تھے۔

پولیس کا کہنا ہے کہ واقعے کے فوراً بعد اہلِ محلہ نے اپنی مدد آپ کے تحت امدادی کارروائیاں شروع کیں اور ملبے میں دبے افراد کو نکالا، جس کے بعدزخمیوں کو فوری طبی امداد کے لیے اسپتال منتقل کر دیا گیا،جہاں ان کو بہتر طبی امداد دی جا رہی ہے۔