نواز شریف سینٹر فار ارلی چائلڈ ایجوکیشن ابتدائی تعلیم میں انقلابی قدم ہے ، تعلیمی ماہر

 پنجاب یونیورسٹی کے شعبہ فلم اینڈ براڈکاسٹنگ کی چیئرپرسن پروفیسر ڈاکٹر لبنیٰ ظہیر نے نواز شریف سینٹر آف ایکسیلنس فار ارلی چائلڈ ہوڈ ایجوکیشن کا دورہ کیا۔  منیجنگ ڈائریکٹر ڈاکٹر خرم شہزاد نے ان کا استقبال کیا اور ادارے کے اغراض و مقاصد، سہولیات اور اب تک کی پیشرفت پر تفصیلی بریفنگ دی۔

ڈاکٹر لبنیٰ ظہیر نے اس منصوبے کو ابتدائی تعلیم کے میدان میں ایک انقلابی قدم قرار دیا اور وزیراعلیٰ پنجاب محترمہ مریم نواز شریف کے وژن کی بھرپور تعریف کی۔ اُن کا کہنا تھا کہ اس جدید اور مثالی مرکز کی تشکیل میں وزیراعلیٰ پنجاب کا وژن اور قیادت قابلِ ستائش ہے۔

دورے کے دوران انہوں نے بچوں کے لیے بنائے گئے مختلف تعلیمی و تفریحی مقامات کا مشاہدہ کیا اور تدریسی انداز و ماحول کو سراہا۔ اُنہوں نے ٹیم کی محنت کو سراہتے ہوئے کہا کہ یہ ادارہ مستقبل میں ابتدائی تعلیم کے لیے ایک بہترین ماڈل ثابت ہوگا۔

نواز شریف سینٹر آف ایکسیلنس نہ صرف بچوں کو معیاری تعلیم فراہم کرنے کا عزم رکھتا ہے بلکہ اساتذہ کی تربیت کے لیے بھی ایک نمایاں کردار ادا کرے گا۔