خیبرپختونخوا سمیت ملک بھر میں شدید بارشوں اور سیلاب سے 45 افرادجاں بحق ،متعدد زخمی

اسلام آباد: خیبر پختونخوا سمیت ملک بھر میں حالیہ بارشوں سے  ہونے والے نقصانات کی تفصیلات جاری کردی گئی ہیں۔

رپورٹ کے مطابق ملک بھر میں حالیہ بارشوں سے اب تک 45 افراد جاں بحق ہوئے،پنجاب 13 اور خیبرپختونخوا میں 21 افراد حالیہ بارشوں میں جاں بحق ہوئے، سندھ 7 اور بلوچستان میں 4افراد زندگی کی بازی ہار گئے۔

پرونشل ڈیزاسٹر منیجمنٹ اتھارٹی (پی ڈی ایم اے) خیبر پختونخوا کی رپورٹ کے مطابق سیلابی ریلوں کی زد میں آکر سوات میں 13، ایبٹ آباد میں 3 جبکہ پشاور، چارسدہ، مالاکنڈ اور شانگلہ میں ایک ایک شخص جاں بحق ہوا، جبکہ 11 افراد بھی زخمی ہوئے۔

رپورٹ کے مطابق سوات میں 6 گھر مکمل تباہ ہوئے اور  50 گھروں کو جزوی نقصان پہنچا۔

رپورٹ میں مزید بتایا گیا ہے کہ دریائے سوات کا سیلابی ریلا دریائے کابل میں داخل ہوگیا جس کی وجہ سے دریائے کابل میں پانی کے بہاؤ  میں اضافہ ہوگیا۔  

سیلابی ریلا آج کسی وقت نوشہرہ کے مقام سے گزرے گا، اس حوالے سے ضلعی انتظامیہ نے الرٹ جاری کردیا۔

اسی طرح پنجاب میں حالیہ بارشوں سے 39 ، سندھ16 اور بلوچستان میں 2 افراد ذخمی ہوئے،حالیہ بارشوں سے پنجاب میں 19 مکانات کو جزوی نقصان پہنچا۔

حالیہ بارشوں کے دوران ملک بھر میں 9 ریسکیو آپریشن کئے گئے،7آپریشن خیبرپختونخوا،گلگت بلتستان اور بلوچستان میں ایک ایک ریسکیو آپریشن کیا گیا،مجموعی طور پر 135 افراد کو ریسکیو کیا گیا۔

دوسری جانب این  ڈی ایم اے کی جانب سے بارشوں کا سلسلہ یکم جولائی تک جاری رہنے کا الرٹ تمام متعلقہ اضلاع کو پہلے ہی جاری کیا جاچکا ہے۔ خیبرپختونخوا کے بیشتراضلاع میں اگلے 48 گھنٹوں کے دوران مزید بارشوں کی پیشگوئی کردی گئی ہے۔

حکام نے قومی و صوبائی شاہراہوں پر مسافروں کو محتاط رہنے اور متبادل راستے اختیار کرنے کی ہدایت کی ہے، عوام سے گزارش ہے کہ آندھی، ژالہ باری اور گرج چمک کے دوران محفوظ جگہوں پر پناہ لیں۔