ہمارا افغانستان سے ایک ہی مطالبہ ہے کہ ان کی سرزمین ہمارے خلاف استعمال نہیں ہونی چاہیے،وزیر دفاع

اسلام آباد:وزیر فاع خواجہ آصف نے کہا ہے کہ ہمارا افغانستان سے ایک ہی مطالبہ ہے کہ ان کی سرزمین ہمارے خلاف استعمال نہیں ہونی چاہیے۔

تفصیلات کے مطابق اسلام آباد میں پارلیمنٹ ہاؤس کے باہر میڈیا سے گفتگو کے دوران وزیر دفاع خواجہ آصف نے افغانستان سے مذاکرات سے متعلق کہا کہ پاکستانی وفد استنبول روانہ ہو گیا ہے اور کل مذاکرات شروع ہو جائیں گے۔

میڈیا سے گفتگومیں خواجہ آصف نے افغان حکومت کو خطے میں امن کے لیے دانش مندی سے فیصلے کرنے پر زور دیتے ہوئے کہا ہے کہ پاک افغان مذاکرات میں پیش رفت کی امید ہوتی ہے تبھی بات کی جاتی ہے۔

انہوں نے مزید کہا کہ پاک ،افغان مذاکرات میں پیش رفت کی امید ہوتی ہے تو تبھی بات کی جاتی ہے، اگر پیش رفت کا امکان نہ ہو تو پھر مذاکرات وقت کا ضیاع ہی ہے۔

آئینی ترمیم کے حوالے سے گفتگو کرتے ہوئے وزیر دفاع نے کہا کہ اگلے ہفتے آئینی ترمیم کی کوئی شکل سامنے آ جائے گی، تمام پارٹیوں سے مشاورت کے بعد آئینی ترمیم کا مسودہ سامنے لائیں گے، بلاول بھٹو کا حق ہے کہ وہ کسی بھی معاملے پر اپنی رائے کا اظہار کرسکتے ہیں، اگر انہوں نے ٹوئٹ کی ہے تو اس میں کچھ غلط نہیں۔

خواجہ آصف نے مزید کہاکہ ستائیسویں آئینی ترمیم کا مسودہ فائنل ہونے سے قبل کچھ بھی کہنا بنتا نہیں، ابھی اعتراضات کے اوپر بات نہیں ہو سکتی۔

واضح رہے کہ پاکستان اور افغان طالبان کے درمیان مذاکرات کا دوسرا دور کل شیڈول کے مطابق استنبول میں ہوگا۔ مذاکرات میں پاکستان افغان سرزمین سے دہشت گردی کے خاتمے پر زور دے گا۔