باجوڑ دھماکا: اسسٹنٹ کمشنر، تحصیلدار سمیت 5 افراد شہید، 16 زخمی ،دہشت گرد گروہ ’الخوارج‘ ملوث قرار

باجوڑ کے علاقے صدیق آباد پھاٹک، میلہ گراؤنڈ کے قریب زور دار بم دھماکا ہوا، جس کے نتیجے میں اسسٹنٹ کمشنر نواگئی فیصل اسماعیل، تحصیلدار نواگئی، دو پولیس اہلکاروں سمیت پانچ افراد شہید جبکہ 16 زخمی ہو گئے۔

زخمیوں میں شامل پولیس سب انسپکٹر نور حکیم کو مزید علاج کے لیے پشاور منتقل کیا جا رہا تھا، تاہم وہ زخموں کی تاب نہ لاتے ہوئے راستے میں دم توڑ گئے۔

دھماکے کی اطلاع ملتے ہی ریسکیو 1122 کی میڈیکل ٹیمیں فوری طور پر موقع پر پہنچ گئیں اور زخمیوں کو ابتدائی طبی امداد فراہم کرنے کے بعد ڈسٹرکٹ اسپتال خار منتقل کیا گیا۔

آئی جی خیبرپختونخوا ذوالفقار حمید نے ابتدائی معلومات کی بنیاد پر بتایا کہ حملے میں اسسٹنٹ کمشنر فیصل اسماعیل کی گاڑی کو نشانہ بنایا گیا، اور ابتدائی شواہد کے مطابق اس میں کالعدم دہشت گرد گروہ ’الخوارج‘ کے ملوث ہونے کے امکانات ہیں۔

انہوں نے مزید کہا کہ واقعے کی مکمل تحقیقات جاری ہیں، شواہد اکٹھے کیے جا رہے ہیں، اور بم ڈسپوزل اسکواڈ جائے وقوعہ پر موجود ہے تاکہ دھماکے کی نوعیت کا تفصیلی جائزہ لیا جا سکے۔ ان کا کہنا تھا کہ دہشت گردوں کو قانون کے کٹہرے میں لایا جائے گا۔

صدر مملکت آصف علی زرداری نے واقعے کی شدید مذمت کرتے ہوئے شہداء کے لواحقین سے دلی تعزیت کا اظہار کیا۔ انہوں نے کہا کہ دہشت گرد انسانیت کے دشمن ہیں اور ان کے خلاف ہر ممکن اقدام کیا جائے گا۔

وزیراعظم شہباز شریف نے بھی واقعے پر گہرے دکھ اور افسوس کا اظہار کرتے ہوئے شہداء کی بلندی درجات اور زخمیوں کی جلد صحت یابی کی دعا کی۔ انہوں نے زخمیوں کو ہر ممکن طبی سہولیات فراہم کرنے کی ہدایت جاری کی۔

مشیر اطلاعات خیبرپختونخوا بیرسٹر ڈاکٹر سیف نے واقعے کو افسوسناک قرار دیتے ہوئے کہا کہ ملک دشمن عناصر اپنے مذموم عزائم میں کبھی کامیاب نہیں ہوں گے۔ وزیراعلیٰ خیبرپختونخوا نے دھماکے کی فوری تحقیقات کا حکم دیتے ہوئے زخمیوں کو مکمل علاج کی سہولیات فراہم کرنے کی ہدایات دی ہیں۔