توہین عدالت: شیخ حسینہ واجد کو 6 ماہ قید، متنازع آڈیو بیان عدالت میں مداخلت قرار

ڈھاکا: بنگلادیش کی انٹرنیشنل کرائم ٹریبونل نے سابق وزیراعظم اور عوامی لیگ کی سربراہ شیخ حسینہ واجد کو توہین عدالت کا مرتکب قرار دیتے ہوئے 6 ماہ قید کی سزا سنا دی۔

بنگلادیشی میڈیا رپورٹس کے مطابق، عدالت کا یہ فیصلہ ایک مبینہ آڈیو لیک کے بعد سامنے آیا، جس میں شیخ حسینہ کو ایک مقامی رہنما سے گفتگو کرتے ہوئے سنا گیا، جہاں وہ کہتی ہیں: "میرے خلاف 227 مقدمے ہیں، اب مجھے 227 لوگوں کو مارنے کا لائسنس مل گیا۔"

عدالت نے اس بیان کو عدالتی کارروائی میں سنگین مداخلت اور توہین عدالت قرار دیا۔ فیصلے میں کہا گیا کہ سابق وزیراعظم کا یہ رویہ نہ صرف عدالتی وقار کے منافی ہے بلکہ قانون کی حکمرانی پر بھی سوالیہ نشان ہے۔

رپورٹس کے مطابق، عدالت نے عوامی لیگ کی طلبہ تنظیم چھاترا لیگ کے لیڈر شکیل آکند کو بھی عدالتی امور میں مداخلت پر 2 ماہ قید کی سزا سنائی ہے۔

یاد رہے کہ شیخ حسینہ واجد، جو ملک کی سب سے بڑی سیاسی جماعت عوامی لیگ کی سربراہ بھی ہیں، گزشتہ سال اگست میں طلبہ تحریک کے بعد بنگلادیش سے فرار ہوکر بھارت چلی گئی تھیں۔ تحریک کے دوران ان کی حکومت کے خلاف شدید مظاہرے اور احتجاجی جلسے جلوس ہوئے تھے، جن میں طلبہ کی بڑی تعداد شریک تھی۔