عراق پر امریکی حملے کے ماسٹرمائنڈ سابق نائب صدر ڈک چینی انتقال کر گئے

واشنگٹن ڈی سی:امریکا کے سابق نائب صدر ڈک چینی (Dick Cheney)84 سال کی عمر میں انتقال کر گئے۔ انہیں نمونیا اور دل و شریانوں کی بیماری تھی۔

غیر ملکی میڈیا رپورٹس کے مطابق ان کے اہلِ خانہ نے منگل کو جاری بیان میں بتایا کہ چینی کا انتقال نمونیا اور دل و خون کی شریانوں کے امراض سے پیدا ہونے والی پیچیدگیوں کے باعث ہوا ہے۔

ان کے اہل خانہ کا کہنا ہے کہ’’ان کی 61 سالہ اہلیہ لین چینی، بیٹیاں لز اور میری، اور دیگر قریبی افراد ان کے آخری لمحات میں ساتھ موجود تھے۔

اہل خانہ کی جانب سے جاری بیان میں مزید کہا گیا ہے کہ ڈک چینی ایک عظیم اور نیک انسان تھے جنہوں نے اپنی اولاد کو حب الوطنی، جرات، عزت، محبت، مہربانی اور فلائی فشنگ جیسی خوبیاں سکھائیں۔

خیال رہے کہ ڈک چینی، جو سابق امریکی صدر جارج ڈبلیو بش کے ساتھ دو مسلسل ادوار (2001 سے 2009) تک امریکا کے 46ویں نائب صدر کے طور پر خدمات انجام دیتے رہے، دہائیوں تک واشنگٹن کی سیاست میں ایک طاقتور اور متنازع شخصیت کے طور پر جانے جاتے تھے۔

وہ امریکی سیاست کے سب سے زیادہ اثر و رسوخ رکھنے والے مگرتنازع کا شکار رہنے والے رہنماؤں میں سے ایک سمجھے جاتے ہیں،ڈک چینی نے 9/11 حملوں کے بعد امریکہ کی ’’وار آن ٹیرر‘‘ پالیسی میں مرکزی کردار ادا کیا، جس میں افغانستان اور بعد ازاں عراق پر امریکی حملہ شامل تھا۔