لاہور میں پالتو شیر کے حملے سے دو بچوں سمیت ایک خاتون زخمی

لاہور کے علاقے شاہ دی کھوئی میں ملک شانی کے ڈیرے میں پالتو شیر کے حملے سے دو بچے اور ایک خاتون زخمی ہو گئے

پولیس کے مطابق فارم ہاؤس میں موجود شیر کا جنگلہ کھلا رہ جانے کی وجہ سے وہ باہر آ گیا اور اچانک فیملی پر جھپٹ پڑا۔ حملے کے بعد علاقے میں خوف و ہراس پھیل گیا۔ زخمیوں کو فوری طور پر جناح اسپتال منتقل کر دیا گیا، جہاں ان کا علاج جاری ہے۔

ذرائع کے مطابق شیر کی دیکھ بھال میں غفلت برتی گئی، جس کے نتیجے میں یہ واقعہ پیش آیا۔ وائلڈ لائف ڈیپارٹمنٹ نے فوری کارروائی کرتے ہوئے شیر کو تحویل میں لے لیا ہے۔

پولیس نے متاثرہ خاندان کے فرد محمد قیصر باجوہ کی مدعیت میں مقدمہ درج کر لیا ہے، جس میں اقدامِ قتل سمیت دیگر دفعات شامل کی گئی ہیں۔ پولیس ذرائع کے مطابق فارم ہاؤس کے مالک ملک ناظم کے بیٹے، ملک بہرام کو حراست میں لے لیا گیا ہے اور تفتیش جاری ہے۔

وائلڈ لائف ایکٹ اور عوامی تحفظ کے تحت مزید قانونی کارروائی متوقع ہے، جبکہ واقعے نے فارم ہاؤسز میں رکھے گئے جنگلی جانوروں کی نگرانی اور حفاظتی انتظامات پر سوالیہ نشان کھڑا کر دیا ہے۔