منشیات فروشی کے لیے بچی کے استعمال پر والدین کی فوری گرفتاری کا حکم

سندھ ہائیکورٹ نے 14 سالہ منشیات فروش بچی کی درخواستِ ضمانت پر سماعت کے دوران بچی سے منشیات فروخت کروانے پر والدین کی فوری گرفتاری کا حکم دے دیا۔

سندھ ہائیکورٹ میں کیس کی سماعت جسٹس عمر سیال نے کی۔ عدالت نے بچی سے منشیات فروشی کروانے پر شدید برہمی کا اظہار کرتے ہوئے حکم دیا کہ والدین کو گرفتار کرکے منشیات فروشی میں بچی کے استعمال سے متعلق تحقیقات کی جائیں۔

عدالت نے بچی کی 5 ہزار روپے میں ضمانت منظور کرتے ہوئے اسے پھوپھی کے حوالے کرنے کا حکم دیا۔

سماعت کے دوران جسٹس عمر سیال نے ریمارکس دیے کہ “والدین بچوں کی تربیت، نگرانی اور حفاظت کے ذمہ دار ہوتے ہیں، اگر بچی کے والدین منشیات فروشی میں ملوث پائے گئے تو ان کے خلاف سخت کارروائی کی جائے، اور بچی کو چائلڈ پروٹیکشن اتھارٹی کے حوالے کیا جائے۔”

پراسیکیوشن کے مطابق، بچی سعدیہ سے 510 گرام ہیروئن برآمد ہوئی تھی، جبکہ بچی نے بیان دیا کہ یہ منشیات اس کی والدہ آسیہ عرف ون ٹین نے فروخت کے لیے دی تھی۔

عدالت نے ریمارکس دیے کہ “منشیات فروشی کے لیے بچوں کے استعمال کا بڑھتا ہوا رجحان انتہائی تشویشناک ہے۔ یہ بچوں کا ویسا ہی استحصال ہے جیسا خواتین کا کیا جاتا ہے۔ اقوام متحدہ کے بچوں کے حقوق کے کنونشن کے تحت ریاست کی یہ ذمہ داری ہے کہ وہ ایسے استحصال کی روک تھام یقینی بنائے۔”