مظفرآباد: سیاحوں کی گاڑی دریائے نیلم میں جاگری، 6 افراد جاں بحق،ایک زخمی

مظفرآباد:  آزاد کشمیر کے علاقے وادی نیلم میں چلہانہ کے مقام پر سیاحوں کی گاڑی بے قابو ہو کر دریائے نیلم میں جاگری،جس کے نتیجے  میں چھ افراد جاں بحق جبکہ ایک شخص زخمی ہو گیا۔

ریسکیو حکام کے مطابق حادثے کے فوری بعد امدادی کارروائیاں شروع کی گئیں، جن کے دوران 4 خواتین کی لاشیں دریا سے نکال لی گئیں،جبکہ باقی افراد کی تلاش کے لیے ریسکیو ٹیموں کا سرچ آپریشن جاری ہے۔

ریسکیو حکام کے مطابق لاشوں اور حادثے میں زخمی ہونے والوں کو قریبی اسپتال منتقل کر دیا گیا،جہاں زخمیوں کو بہتر طبی امداد دی جا رہی ہے۔

ابتدائی اطلاعات کے مطابق گاڑی میں سوار تمام افراد سیاح تھے جو علاقے کی سیر کے لیے آئے تھے،گاڑی کے دریائے نیلم میں گرنے کی وجہ تاحال معلوم نہیں ہو سکی۔

 ضلعی انتظامیہ اور پولیس کی ٹیمیں موقع پر موجود ہیں۔