پاکپتن: ڈسٹرکٹ اسپتال میں 20 بچوں کی اموات کا معاملہ، سی ای او ہیلتھ اور ایم ایس اسپتال گرفتار

صوبہ پنجاب کے ضلع پاکپتن کے ڈسٹرکٹ اسپتال میں 20 بچوں کی اموات کے دلخراش واقعے پر بڑی پیش رفت سامنے آئی ہے، ضلعی اور صوبائی سطح پر اعلیٰ سطحی کارروائیوں کا آغاز کر دیا گیا ہے۔

ابتدائی انکوائری رپورٹ سامنے آنے کے بعد سی ای او ہیلتھ پاکپتن سہیل اصغر اور میڈیکل سپرنٹنڈنٹ (ایم ایس) عدنان غفار کو اسپتال کے میٹنگ روم سے حراست میں لے لیا گیا۔

پولیس نے دونوں افسران کو موقع پر ہی ہتھکڑیاں لگا کر گرفتار کر لیا اور تفتیش کے لیے تھانے منتقل کر دیا۔

 ذرائع کے مطابق مزید ذمہ داران کے خلاف بھی کارروائی متوقع ہے۔

خیال رہے کہ چند روز قبل ڈسٹرکٹ اسپتال میں انتظامیہ کی غفلت کے باعث بچوں کی اموات ہوئیں تھیں، جس کے بعد ضلعی انتظامیہ اور پنجاب حکومت فوری طور پر متحرک ہوئی۔

 چند روز قبل چیف سیکریٹری پنجاب نے اسپتال کا دورہ کیا، اور آج وزیراعلیٰ پنجاب مریم نواز نے ڈسٹرکٹ اسپتال کا ہنگامی دورہ کیا، جہاں انہوں نے بچوں کے وارڈ سمیت دیگر شعبہ جات کا معائنہ کیا،اسپتال کے دورے کے دوران مریضوں کے لواحقین نے وزیراعلیٰ سے شکایات بھی کیں۔

 وزیراعلیٰ کو پیش کی گئی انکوائری رپورٹ کے بعد فوری احکامات جاری کیے گئے جن کی روشنی میں گرفتاری عمل میں لائی گئی۔