نجی ایئرلائن کی سنگین غفلت، لاہور سے کراچی جانے والے مسافر کو جدہ پہنچا دیا

پاکستان کی نجی ایئرلائن کی سنگین غفلت سامنے آ گئی، جس کے تحت لاہور سے کراچی جانے والا ایک مسافر غلطی سے جدہ پہنچا دیا گیا۔ یہ حیران کن واقعہ 8 جولائی کو پیش آیا، جس کے بعد ائرلائن حکام میں کھلبلی مچ گئی۔

مسافر نے گفتگو کرتے ہوئے بتایا کہ ڈومیسٹک ایئرلائن کی جگہ 2 طیارے لگے ہوئے تھے، طیارے میں سوار ہونے کے بعد ایئرہوسٹس کو ٹکٹ بھی دکھائی تھی۔

متاثرہ مسافر نے کہا کہ ایئرہوسٹس کا فرض تھا کہ وہ بتاتیں غلط طیارے میں آگیا ہوں، میرے پاس پاسپورٹ اور ویزا بھی نہیں تھا، 2گھنٹے بعد میں نے کہا کہ فلائٹ اب تک کراچی کیوں نہیں پہنچی، میری بات سن کر پوراعملہ پریشان ہوگیا اور کہا آپ کی غلطی ہے۔

مسافر نے مزید کہا کہ عملے کو شکایت کی تو مجھے ہی غلطی کا ذمہ داری ٹھہرا دیا گیا، میں نے کہا کراچی پہنچائیں تو کہا دو تین دن لگیں گے، مجھے کہا گیا کہ ایف آئی اے انکوائری کرے گی۔

واقعہ کے بعد مسافر کی جانب سے شکایت پر ایئرلائن حکام حرکت میں آئے اور فوری اقدامات کیے گئے۔

ایئر لائن حکام نے بعد ازاں مسافر کو پہلے جدہ سے لاہور واپس لایا، اور پھر کراچی پہنچایا۔ اس دوران ایئرلائن کو مسافر کی مکمل سفری لاگ بک اور عملے کی لاپرواہی کا بھی جائزہ لینا پڑا۔

ایئرپورٹ منیجر نے اتھارٹی کو نجی ایئرلائن کےخلاف کارروائی کی درخواست دے دی۔