سینیٹ انتخابات: پی ٹی آئی رہنما مشال یوسفزئی پارٹی ٹکٹ کے لیے سرگرم، چیئرمین گوہر سے رابطہ

پاکستان تحریک انصاف (پی ٹی آئی) کی سینئر رہنما مشال یوسفزئی خیبرپختونخوا سے سینیٹ انتخابات میں حصہ لینے کے لیے پارٹی ٹکٹ کے حصول کی کوششوں میں سرگرم ہو گئی ہیں۔ ذرائع کے مطابق مشال یوسفزئی نے اس سلسلے میں چیئرمین پی ٹی آئی بیرسٹر گوہر علی خان سے فون پر رابطہ کیا ہے۔

ذرائع کا کہنا ہے کہ مشال یوسفزئی نے سینیٹ ٹکٹ کے لیے پارٹی قیادت سے باضابطہ طور پر رابطے شروع کر دیے ہیں، اور انہوں نے ٹیلیفونک گفتگو میں چیئرمین گوہر کو اپنی دلچسپی سے آگاہ کیا۔ مشال یوسفزئی کا مؤقف ہے کہ انہیں عمران خان کی جانب سے سینیٹ کے لیے کاغذاتِ نامزدگی جمع کرانے کی ہدایت ملی ہے، جو اڈیالہ جیل میں بشریٰ بی بی سے ان کے اہل خانہ کی ملاقات کے دوران پہنچایا گیا۔

ذرائع کے مطابق چیئرمین بیرسٹر گوہر نے فون کال میں مشورہ دیا کہ وہ کاغذات نامزدگی جمع کرا دیں، اور حتمی فیصلہ پارٹی قیادت بعد میں کرے گی۔ مشال یوسفزئی نے اس سلسلے میں پی ٹی آئی کے دیگر سینئر رہنماؤں، بشمول عاطف خان، سے بھی مشاورت کی ہے، تاہم انہوں نے میڈیا کے سامنے اس بارے میں کوئی سرکاری بیان جاری نہیں کیا۔

اس حوالے سے چیئرمین پی ٹی آئی بیرسٹر گوہر کا کہنا ہے کہ انہیں اب تک عمران خان کی طرف سے کسی مخصوص امیدوار کو براہ راست سینیٹ ٹکٹ دینے کی کوئی ہدایت موصول نہیں ہوئی۔ تاہم انہوں نے تصدیق کی کہ مشال یوسفزئی نے ان سے رابطہ کیا ہے اور ان کی درخواست پر غور جاری ہے۔ حتمی فیصلہ پارٹی مشاورت کے بعد کیا جائے گا۔

یاد رہے کہ خیبرپختونخوا میں سینیٹ انتخابات 21 جولائی کو منعقد ہوں گے، جن میں 11 نشستوں پر ووٹنگ متوقع ہے۔