فرانس: شوہر اپنی بیوی کو ہائی وے پر چھوڑ کر 300 کلومیٹر آگے نکل گیا

فرانس میں ایک انوکھا اور حیران کن واقعہ پیش آیا جہاں تفریحی سفر پر جانے والے ایک شخص نے اپنی بیوی کو ہائی وے کے گیس اسٹیشن پر بھول کر 300 کلومیٹر دور تک سفر کر لیا۔

بین الاقوامی میڈیا رپورٹس کے مطابق، پیرس سے تعلق رکھنے والے شخص نے اپنی بیوی اور 22 سالہ بیٹی کے ساتھ مراکش کی سیر کا منصوبہ بنایا اور 5 جولائی کو سفر کا آغاز کیا۔ دورانِ سفر جب گاڑی میں فیول کم ہوا تو وہ مختلف گیس اسٹیشنز پر رکتا رہا۔

تاہم ایک مقام پر ایسا بھی ہوا جہاں وہ اپنی بیوی کو گاڑی میں واپس لیے بغیر سفر پر روانہ ہوگیا۔ حیرت کی بات یہ ہے کہ اُسے یہ بھی یاد نہ رہا کہ بیوی کو کس اسٹیشن پر چھوڑا۔ جب 300 کلومیٹر کا فاصلہ طے ہو چکا تو اسے اپنی بیوی کی غیر موجودگی کا احساس ہوا۔

مذکورہ شخص نے فوراً پولیس سے رابطہ کیا۔ پولیس حکام کے مطابق، انہیں یہ سن کر خاصی حیرت ہوئی کہ شوہر اور گاڑی میں موجود بیٹی دونوں کو نہیں معلوم کہ بیوی کہاں رہ گئی — کیونکہ بیٹی سفر کے دوران سو رہی تھی۔

ابتدائی طور پر پولیس نے ہائی وے پر قائم مختلف سروس ایریاز اور گیس اسٹیشنز پر تلاش کی کوشش کی، مگر کوئی کامیابی نہ ملی۔ بعد ازاں موبائل نیٹ ورک ٹریکنگ کی مدد سے خاتون کی موجودگی کا پتہ چلایا گیا۔

پولیس کے مطابق، خاتون ایک موٹر وے سروس اسٹیشن پر موجود تھیں اور اپنے شوہر اور بیٹی کے واپس آنے کا انتظار کر رہی تھیں۔ بعد ازاں، خاندان ایک بار پھر مراکش کی جانب روانہ ہو گیا — اس بار مکمل اور ہوشیار!