بلوچستان میں دہشت گردی میں 45 فیصد اضافہ، چھ ماہ میں 257 افراد جاں بحق: محکمہ داخلہ

محکمہ داخلہ بلوچستان نے یکم جنوری سے 30 جون 2025 تک کے دوران صوبے میں دہشت گردی کے واقعات کے اعدادوشمار جاری کر دیے ہیں، جن کے مطابق دہشت گردی کی لہر میں خطرناک حد تک اضافہ دیکھنے میں آیا ہے۔

رپورٹ کے مطابق، سال کی پہلی ششماہی میں دہشت گردی کے واقعات میں 45 فیصد اضافہ ہوا، جبکہ سیٹلرز (غیر مقامی افراد) کی ٹارگٹ کلنگ میں 100 فیصد اضافہ ریکارڈ کیا گیا۔

محکمہ داخلہ کے اعداد و شمار کے مطابق: دہشت گردی کے 501 واقعات رونما ہوئے , ان واقعات میں 133 سیکیورٹی اہلکاروں سمیت 257 افراد جاں بحق ہوئے۔

238 اہلکاروں سمیت 492 افراد زخمی بھی ہوئے۔

رپورٹ میں مزید بتایا گیا ہے کہ غیر مقامی افراد پر 14 حملے کیے گئے، جن میں 52 افراد جاں بحق اور 11 زخمی ہوئے۔

بم، دستی بم، آئی ای ڈی، بارودی سرنگوں اور راکٹ حملوں کے 81 واقعات پیش آئے، جن میں 26 افراد جان سے گئے اور 112 زخمی ہوئے۔

عام شہریوں پر حملوں کے 39 واقعات میں 11 ہلاکتیں اور 29 زخمی رپورٹ ہوئے۔

ٹرینوں پر دو حملوں کے دوران 29 افراد ہلاک ہوئے۔

پولیو ورکرز پر ایک حملے میں ایک کارکن جاں بحق ہوا ، موبائل فون ٹاورز پر 9 حملوں میں دو افراد زخمی ہوئے۔

یہ رپورٹ اس امر کی نشاندہی کرتی ہے کہ بلوچستان میں امن و امان کی صورتحال بدستور سنگین ہے اور دہشت گردوں کا نشانہ عام شہری، سیکیورٹی اہلکار اور بنیادی سہولیات کی فراہمی سے وابستہ افراد بھی بن رہے ہیں۔