بانی پی ٹی آئی کی سابقہ اہلیہ ریحام خان نے نئی سیاسی جماعت کا اعلان کر دیا

ویب ڈیسک: پاکستان تحریک انصاف کے بانی عمران خان کی سابقہ اہلیہ اور صحافی و سماجی کارکن ریحام خان نے باضابطہ طور پر اپنی نئی سیاسی جماعت کے قیام کا اعلان کر دیا،ان کی پارٹی کا نام ”پاکستان ریپبلک پارٹی“ رکھا گیا ہے۔

اس موقع پر میڈیا سے گفتگوکرتے ہوئے ریحام خان نے کہا کہ ان کی جماعت حکمرانوں کا پیچھا کرے گی اور عوامی آواز بن کر ہر فورم پر مسائل اُٹھائے گی۔

 ان کا کہنا تھا کہ ”پاکستان ریپبلک پارٹی“ کا مقصد صرف اقتدار کا حصول نہیں بلکہ عوامی فلاح، شفافیت اور انصاف کے لیے جدوجہد ہے۔ 

میڈیا سے گفتگو میں ریحام خان نے مزید کہا کہ ملک کے موجودہ سیاسی نظام میں عام شہری کی آواز دبائی جاتی ہے، لیکن ان کی جماعت ہر نظرانداز شدہ طبقے کی نمائندہ بنے گی۔ 

انہوں نے اس عزم کا اظہار کیا کہ ان کی پارٹی سیاست کو خدمت میں بدلنے کے لیے میدان میں اتری ہے۔