ہری پور:جائیداد کے تنازع پر فائرنگ سے 2 افراد قتل، متعدد زخمی

ہری پور: خیبرپختونخوا کے ضلع ہری پورمیں جائیداد کے تنازع پر دو قریبی رشتہ دار گروپوں کے درمیان فائرنگ کے نتیجے میں 2 افراد جاں بحق اور پانچ زخمی ہو گئے۔

تفصیلات کے مطابق یہ افسوسناک واقوعہ ضلع ہری پور کی تحصیل خان پور کے علاقے کوٹلہ میں پیش آیا جہاںجائیداد کے تنازع پر ماموں اور بھانجوں کے درمیان فائرنگ کے نتیجے میں دو افراد جاں بحق جبکہ 5 افراد زخمی ہوگئے۔

پولیس کے مطابق جاں بحق افراد کی شناخت جمیل عباسی اور رضیف عباسی کے ناموں سے ہوئی ہے جبکہ زخمیوں کو فوری طور پر مقامی اسپتال منتقل کر دیا گیاہے جہاں ان کو بہتر طبی امداد دی جا رہی ہے۔

تھانہ مکھنیال پولیس کا کہنا ہے کہ فریقین آپس میں رشتہ دار ہیں اور واقعہ جائیداد کے تنازع کا شاخسانہ ہے،جبکہ پولیس نے موقع پر پہنچ کر شواہد اکٹھے کیے، لاشیں اور زخمیوں کو اسپتال منتقل کیا، اور مقدمہ درج کر کے تفتیش کا آغاز کر دیا ہے۔

دوسری جانب علاقہ مکینوں کا کہنا ہے دونوں خاندانوں کے درمیان پرانا تنازع تھا جو آج افسوسناک انجام کو پہنچا،جبکہ پولیس کی جانب سے مزید قانونی کارروائی جاری ہے۔