عوام کی مشکلات میں مزید اضافہ،حکومت کا تمام یوٹیلٹی اسٹورز 31 جولائی تک بند کرنے کا فیصلہ

اسلام آباد: وفاقی حکومت نے مہنگائی سے ستائی عوام کے مشکلات میں مزید اضافہ کر تے ہوئے ملک بھرمیں قائم تمام یوٹیلٹی اسٹورز 31 جولائی تک بند کرنے کا فیصلہ کر لیا ہے۔

تفصیلات کے مطابق وفاقی وزیر خزانہ محمد اورنگزیب کی زیر صدارت یوٹیلیٹی اسٹورز کارپوریشن کی بندش اور وی ایس ایس پلان کے حوالے سے اجلاس منعقد کیا گیا،جس میںکمیٹی نے دیے گئے اہداف کی روشنی میں اب تک کی پیش رفت کا جائزہ لیا اور آئندہ کے لائحہ عمل پر تفصیلی مشاورت کی۔

اجلاس میں اس بات کا اعادہ کیا گیا کہ حکومت کی ہدایات کے مطابق یو ایس سی کی تمام سرگرمیاں 31 جولائی 2025 تک بند کر دی جائیں گی۔

اجلاس میں یو ایس سی ملازمین کے لیے ایک منصفانہ اور مالی طور پر قابلِ عمل رضاکارانہ علیحدگی اسکیم (وی ایس ایس) کی تشکیل پر تفصیلی گفتگو کی گئی،اور مجوزہ اسکیم کے مختلف پہلوؤں جیسے اندازاً حجم، مالی اثرات، قانونی اور انتظامی نکات کا بھی جائزہ لیا گیا۔

دوران اجلاس کمیٹی نے تجویز دی کہ یو ایس سی کے آپریشنز سے متعلق نجکاری یا اثاثہ جات کی فروخت کے امکانات اور ساخت کا جائزہ لینے کے لیے نجکاری کمیشن سے مشاورت کی جائے۔

اجلاس میں چیئرمین نے اسٹیبلشمنٹ ڈویژن کے سیکریٹری کی سربراہی میں ایک ذیلی کمیٹی تشکیل دی، جس میں وزارتِ خزانہ اور وزارتِ صنعت و پیداوار کے نمائندگان شامل ہوں گے۔ 

یہ ذیلی کمیٹی مجوزہ وی ایس ایس کی قانونی، عملی، مالیاتی ساخت اور حجم کا جائزہ لے کر رواں ہفتے کے آخر تک رپورٹ پیش کرے گی، یہ رپورٹ مرکزی کمیٹی کو حتمی سفارشات مرتب کرنے میں معاونت دے گی، جو مقررہ اہداف کے مطابق وزیرِ اعظم کو پیش کی جائیں گی۔