بلوچستان حکومت کا گوادر سے خلیجی ممالک تک فیری سروس شروع کرنے پرغور

وزیرِ اعلیٰ بلوچستان میر سرفراز بگٹی نے کہا ہے کہ گوادر سے عمان تک فیری سروس شروع کرنے پر سنجیدگی سے غور کیا جا رہا ہے جس سے ناصرف زائرین بلکہ مقامی آبادی کو بھی آمد و رفت میں سہولت حاصل ہوگی۔

وفاقی وزارت برائے ’میری ٹائم افیئرز‘ کے زیرِ صدارت اجلاس ہوا،  اجلاس میں گوادر کی ترقی، عوامی سہولتوں اور نوجوانوں کے لیے روزگار کے مواقع بڑھانے سے متعلق اہم معاملات زیرِ بحث آئے۔

اجلاس سے ویڈیو لنک کے ذریعے خطاب کے دوران وزیرِ اعلیٰ بلوچستان نے کہا کہ گوادار سے عمان تک فیری چلانے  کے منصوبے پر بلوچستان حکومت کی جانب سے تعاون کی یقین دہانی کروائی گئی ہے۔

اجلاس میں فیری آپریشنز کے تکنیکی اور مالی پہلوؤں کا جائزہ لیا گیا ، اس موقع پر وفاقی وزیر جنید انوار نے کہا کہ فیری سروس کیلئے نجی شعبے کی دلچسپی بڑھی ہے۔

میر سرفراز بگٹی نے گوادر شہر میں گوادر پورٹ اتھارٹی کے تحت قائم کردہ واٹر پلانٹ کو خوش آئند قرار دیتے ہوئے مزید کہا کہ اس منصوبے کے ذریعے روزانہ 1.2 ملین گیلن پینے کا صاف پانی شہریوں کو میسر آئے گا جو طویل عرصے سے درپیش پانی کے مسئلے کے دیرپا حل کی طرف اہم قدم ہے۔

انہوں نے کہا کہ گوادر پورٹ اتھارٹی کے تمام مجوزہ ترقیاتی منصوبوں کو بھرپور اسپورٹ دی جائے گی تاکہ گوادر کی بندرگاہ ملکی معیشت میں مرکزی کردار ادا کر سکے۔

وزیرِ اعلیٰ میر سرفراز بگٹی نے کہا کہ گوادر کی ترقی درحقیقت بلوچستان کی ترقی ہے اور اس مقصد کے حصول کے لیے تمام ممکنہ وسائل اور اقدامات بروئے کار لائے جا رہے ہیں۔