سینیٹ میں 5/6 فارمولے پر اتفاق، پی ٹی آئی میں اندرونی بحران برقرار

پشاور: تحریک انصاف میں سینیٹ انتخابات کے لیے ٹکٹوں کی تقسیم پر شدید اختلافات سامنے آ گئے ہیں۔ وزیراعلیٰ خیبرپختونخوا علی امین گنڈاپور کی جانب سے ٹکٹوں سے محروم پارٹی رہنماؤں کو منانے کی کوشش ناکام ہو گئی، اور ناراض امیدواروں نے اپنے کاغذاتِ نامزدگی واپس نہ لینے کا فیصلہ برقرار رکھا ہے۔

ذرائع کے مطابق وزیراعلیٰ گنڈاپور اور پی ٹی آئی چیئرمین بیرسٹر گوہر و سلمان اکرم راجہ کی موجودگی میں ارشاد حسین، عائشہ بانو، عرفان سلیم اور وقاص اورکزئی سمیت دیگر ناراض امیدواروں سے ملاقات ہوئی، مگر مذاکرات کسی نتیجے پر نہیں پہنچ سکے اور پارٹی کے اندر ڈیڈ لاک برقرار ہے۔

ناراض رہنماؤں نے واضح مؤقف اپنایا ہے کہ وہ کسی صورت انتخابی دوڑ سے باہر نہیں ہوں گے اور کاغذات واپس لینے کا سوال ہی پیدا نہیں ہوتا۔

 حکومت-اپوزیشن میں "5/6 فارمولا" پر پیش رفت :
واضح رہے کہ گزشتہ رات خیبرپختونخوا میں سینیٹ انتخابات کو بلامقابلہ کرانے کے لیے حکومت اور اپوزیشن کے درمیان ایک اہم معاہدہ طے پایا ہے۔ ذرائع کے مطابق، "5/6 فارمولا" پر اتفاق ہوا ہے جس کے تحت تحریک انصاف کو 6 اور اپوزیشن کو 5 نشستیں ملیں گی، جبکہ دیگر امیدوار دستبردار ہو جائیں گے۔

مگر پی ٹی آئی کے اندر جاری اندرونی اختلافات اور ناراضی کی فضا اس معاہدے پر ممکنہ عملدرآمد میں رکاوٹ بن سکتی ہے۔